ബാലുശ്ശേരി: കാക്കൂര്‍ സര്‍വിസ് സഹകരണ ബാങ്കിലേക്ക് ഇനിയുള്ള രണ്ട് തസ്തികകളിലേക്കുള്ള നിയമനത്തെ ചൊല്ലി കോണ്‍ഗ്രസില്‍ ആഭ്യന്തര കലാപം.അറ്റന്റര്‍,സെക്യൂരിറ്റി തസ്തികകളെ ചൊല്ലിയാണ് തര്‍ക്കം ഉടലെടുത്തത്.നിലവില്‍ പതിനൊന്നംഗ ഭരണ സമിതിയില്‍ മുരളി വിഭാഗത്തിന് നാലും ഐ വിഭാഗത്തിന് രണ്ടും എ വിഭാഗത്തിന് നാലും അംഗങ്ങളാണുള്ളത്.
വരാനിരിക്കുന്ന ഒഴിവിലേക്ക് ഒരു സീറ്റ് എ വിഭാഗത്തിനും ഒന്ന് ഐ വിഭാഗത്തിനും നല്‍കാനായിരുന്നു തീരുമാനം. ഇതില്‍ എ വിഭാഗം തീരുമാനിച്ചയാളെ മുരളി വിഭാഗക്കാരനായ പ്രസിഡന്റിന് സ്വീകാര്യമല്ലാത്തതാണ് പ്രശ്‌നം രൂക്ഷമാക്കിയത്. മറ്റാരേയും അംഗീകരിക്കാമെന്ന നിലപാടിലാണ് പ്രസിഡന്റ്.
ഇതിനു വഴങ്ങില്ലെന്ന ശക്തമായ നിലപാടില്‍ എ വിഭാഗക്കാര്‍ ഉറച്ചു നില്‍ക്കുകയാണ്. ഡി.സി.സി പ്രസിഡന്റ് പ്രശ്‌നത്തില്‍ ഇടപെട്ടെങ്കിലും പരിഹാരമായില്ല. ഇതോടെ എ വിഭാഗം കോണ്‍ഗ്രസിന്റെ പരിപാടികളോട് സഹകരിക്കുകയില്ലെന്ന നിലപാടിലെത്തി. യൂത്ത് കോണ്‍ഗ്രസിന്റെ മുഴുവന്‍ പ്രവര്‍ത്തകരും ചില ജില്ലാ ഭാരവാഹികളും പാര്‍ട്ടി വിടുമെന്ന ഭീഷണി മുഴക്കിക്കഴിഞ്ഞു. ഇന്നലെ രാത്രി ഡി.സി.സി പ്രസിഡന്റുമായി വീണ്ടും ചര്‍ച്ച നടത്തിയെങ്കിലും ഫലം കണ്ടില്ല.
ഇന്ന് തീരുമാനമായില്ലെങ്കില്‍ കാക്കൂര്‍ പഞ്ചായത്തില്‍ കലാപം തെരുവിലെത്തുമെന്ന അവസ്ഥയാണുള്ളത്. രാജിവച്ചു വരുന്നവര്‍ക്ക് വാഗ്ദാനങ്ങളുമായി പ്രമുഖ പാര്‍ട്ടികള്‍ രംഗത്തെത്തിയിട്ടുണ്ട്.