തളിപ്പറമ്പ് (കണ്ണൂര്‍): കൊല്ലം പുത്തൂരില്‍ ഗോരക്ഷാ ആക്രമണ കേസില്‍ പ്രതിയായ സൈനികന്റെ വീടാക്രമിച്ച കേസില്‍ അഞ്ച് എസ്.ഡി.പി.ഐ പ്രവര്‍ത്തകര്‍ പിടിയില്‍. സൈനികനായ പുത്തൂര്‍ തെക്കുംപുറത്തെ തേബ്ര സതീഷിന്റെ വീട് പട്ടാപകല്‍ വാനിലെത്തി ആക്രമിച്ച കേസിലെ പ്രതികളായ റിംഷാദ് (30), ഷംസാദ് (31), അമീന്‍ (26), ഷാനവാസ് (38) എന്നിവരെ പറശ്ശിനിക്കടവിലെ ലോഡ്ജിലും മറ്റൊരു പ്രതി നിസാമിനെ (33) തളിപ്പറമ്പിലെ ലോഡ്ജില്‍ വച്ചുമാണ് തളിപ്പറമ്പ് പൊലിസിന്റെ സഹായത്തോടെ പിടികൂടിയത്.
കേസില്‍ ആകെ അഞ്ചു പ്രതികളാണുള്ളത്.
പിടിയിലായവരെ കൊല്ലത്തേക്ക് കൊണ്ടുപോയി. കഴിഞ്ഞ ജൂലൈ രണ്ടിനായിരുന്നു സംഭവം.
ഒളിവില്‍ കഴിയുകയായിരുന്ന പ്രതികളുടെ ടവര്‍ ലൊക്കേഷന്‍ പരിശോധിച്ച് പറശ്ശിനിക്കടവിലുണ്ടെന്നു മനസിലാക്കിയ കൊല്ലം പൊലിസ് തളിപ്പറമ്പ് പൊലിസിന്റെ സഹായം തേടുകയായിരുന്നു. അറവ് മാടുകളുമായി പോവുകയായിരുന്ന കൊട്ടാരക്കര മുസ്‌ലിം സ്ട്രീറ്റ് സ്വദേശികളെ സൈനികനും സുഹൃത്തും മര്‍ദിച്ചിരുന്നു. ഇതിന്റെ തുടര്‍ച്ചയായായിരുന്നു വീടാക്രമിച്ചത്.
കേസില്‍ പോപുലര്‍ ഫ്രണ്ട് പ്രവര്‍ത്തകനായ അബ്ദുല്‍ ജബ്ബാറിനെ (28) നേരത്തെ അറസ്റ്റുചെയ്തിരുന്നു. കൊല്ലം ഈസ്റ്റ് സി.ഐ വിനോജിന്റെ നേതൃത്വത്തിലുള്ള പ്രതികളെ കൊല്ലത്തേക്ക് കൊണ്ടുപോയത്.