പെരിന്തല്‍മണ്ണ: മോഷണശ്രമത്തിനിടെ നാട്ടുകാര്‍ പിടികൂടിയ കള്ളനെ പൊലിസിലേല്‍പ്പിച്ചു. കഴിഞ്ഞദിവസം പുലര്‍ച്ചെ രണ്ടോടെ പെരിന്തല്‍മണ്ണ ജൂബിലി റോഡ് പരിസരത്ത് നിന്നാണ് മോഷണത്തിനായി എത്തിയയാളെ നാട്ടുകാര്‍ പിടികൂടിയത്. തൃശൂര്‍ സ്വദേശി വിനോദ്(45) ആണ് പിടിയിലായത്. ലോകകപ്പ് ഫുട്‌ബോള്‍ മത്സരം കഴിഞ്ഞ് വീട്ടിലേക്ക് മടങ്ങുകയായിരുന്ന യുവാക്കളാണ് പ്രദേശത്തെ വീടിന്റെ ഗെയ്റ്റ് തുറന്ന് മോഷണത്തിനായി അകത്തുകടക്കുന്ന രണ്ടുപേരെ കണ്ടത്. എന്നാല്‍, ഒരാളെ പിടികൂടുന്നതിനിടെ കൂടെയുണ്ടായിരുന്നയാള്‍ ഓടി രക്ഷപ്പെട്ടു. ഇവരുടെ കൈയില്‍ മാരകയാധുങ്ങള്‍ ഉണ്ടായിരുന്നതായും യുവാക്കള്‍ പറഞ്ഞു. പെരിന്തല്‍മണ്ണ പൊലീസിന് കൈമാറിയ പ്രതിയെ ചോദ്യം ചെയ്തുവരികയാണ്.