വടകര: ബി.സോണ്‍ കലോത്സവത്തില്‍ പെണ്‍കുട്ടികളുടെ മാപ്പിളപ്പാട്ട് മത്സരം മികച്ച നിലവാരം പുലര്‍ത്തി. ഇശലിന്റെ ഇമ്പവും താളവും കൊണ്ട് വേദിയെയും സദസിനെയും വിദ്യാര്‍ഥിനികള്‍ കൈയിലെടുത്തു. മാപ്പിളപ്പാട്ടിന്റെയും ഗസലിന്റെയും പെരുമയുള്ള വടകര താഴെഅങ്ങാടി നിറഞ്ഞ ഹര്‍ഷാരവത്തോടെയാണ് മാപ്പിളപ്പാട്ട് മത്സരത്തെ  എതിരേറ്റത്.
മത്സരത്തില്‍ ചെരണ്ടത്തൂര്‍ എം.എച്ച്.ഇ.എസ് കോളജിലെ തസ്‌ലീന ഒന്നാം സ്ഥാനം നേടി. മച്ചിങ്ങലകത്ത് മൊയ്തീന്റെ മക്കംഫതഹിന്റെ ചരിത്രം വിളിച്ചോതുന്നതായിരുന്നു തസ്‌ലീനയുടെ ഗാനം. സുഖിത്തേനും നടിച്ചായത് എന്ന ഇശലില്‍ ആലപിച്ച മാപ്പിളപ്പാട്ടിന് സദസ് മതിമറന്നു താളമിട്ടു. തസ്‌ലീന വടകര സ്വദേശിനിയാണ്.