നിര്‍ണായക പോരാട്ടത്തില്‍ മോഹന്‍ ബഗാനെ 1-0ത്തിന് വീഴ്ത്തി ഐസ്വാള്‍ ഐ ലീഗ് കിരീടത്തിനരികെ

ഐസ്വാള്‍: ഇന്ത്യന്‍ ഫുട്‌ബോളില്‍ ചരിത്രമെഴുതാനൊരുങ്ങി ഐസ്വാള്‍ ഫുട്‌ബോള്‍ ക്ലബ്. വടക്കു കിഴക്കന്‍ സംസ്ഥാനത്ത് നിന്ന് ഒരു ടീം ആദ്യമായി ഐ ലീഗ് കിരീടം സ്വന്തമാക്കുന്നതിന്റെ തൊട്ടടുത്ത് നില്‍ക്കുകയാണ് അവര്‍. കേവലം ഒരു പോയിന്റ് മാത്രമാണ് അവര്‍ക്ക് കിരീടത്തില്‍ മുത്തമിടാന്‍ ആവശ്യം. കിരീടത്തിനായി ഇഞ്ചോടിഞ്ച് പോരാടിയ ഇന്ത്യന്‍ ഫുട്‌ബോളിലെ അതികായരായ മോഹന്‍ ബഗാനെ നിര്‍ണായക പോരാട്ടത്തില്‍ ഒരു ഗോളിന് വീഴ്ത്തിയാണ് ഐസ്വാള്‍ ചാംപ്യന്‍ പട്ടത്തിനടുത്തെത്തി നില്‍ക്കുന്നത്. 16 മത്സരങ്ങള്‍ പൂര്‍ത്തിയായപ്പോള്‍ 33 പോയിന്റുമായി ബഗാന്‍ ഒന്നാമതും ഇത്രയും പോയിന്റുമായി ഐസ്വാള്‍ രണ്ടമാതുമായിരുന്നു. വിജയിക്കുന്ന ടീം ഒന്നാം സ്ഥാനത്തേക്ക് കയറുമെന്ന അവസ്ഥയില്‍ സ്വന്തം തട്ടകത്തില്‍ മോഹന്‍ ബഗാനെ എതിരിട്ട ഐസ്വാള്‍ സോമിംഗ്ലിയാന റാല്‍റ്റെ നേടിയ ഏക ഗോളില്‍ ബഗാനെ മലര്‍ത്തിയടിക്കുകയായിരുന്നു. കളിയുടെ അവസാനം വരെ ഗോള്‍ പിറക്കാതെ പോയ മത്സരത്തില്‍ 83ാം മിനുട്ടിലാണ് റാല്‍റ്റെ വിജയ ഗോള്‍ വലയിലാക്കിയത്. ജയത്തോടെ ഐസ്വാളിന് 36 പോയിന്റും രണ്ടാമതുള്ള മോഹന്‍ ബഗാന് 33 പോയിന്റും. ഈ മാസം 30ന് നടക്കുന്ന ഷില്ലോങ് ലജോങിനെതിരായ പോരാട്ടത്തില്‍ സമനിലയോ വിജയമോ മതി ഐസ്വാളിന് കിരീടം നെഞ്ചോട് ചേര്‍ക്കാന്‍. അവസാന പോരാട്ടത്തില്‍ മോഹന്‍ ബഗാന്‍ ചെന്നൈ സിറ്റി എഫ്.സിയുമായി ഏറ്റുമുട്ടും. ഈ മത്സരത്തില്‍ ബഗാന്‍ വിജയിക്കുകയും ഷില്ലോങിനോട് ഐസ്വാള്‍ തോല്‍ക്കുകയും ചെയ്താല്‍ മാത്രമാണ് ഗോള്‍ ശരാശരിയില്‍ ബഗാന് സാധ്യത നിലനില്‍ക്കുന്നത്.
ഇന്നലെ നടന്ന മറ്റു മത്സരങ്ങളില്‍ ബംഗളൂരുവും ചര്‍ച്ചില്‍ ബ്രദേഴ്‌സും ഗോള്‍ മഴ പെയ്യിച്ച് വിജയമാഘോഷിച്ചു. ബംഗളൂരു മറുപടിയില്ലാത്ത ഏഴും ഗോളുകള്‍ക്ക് ശിവാജിയന്‍സിനെ വീഴ്ത്തിയപ്പോള്‍ ചര്‍ച്ചില്‍ 6-1ന് ചെന്നൈ സിറ്റിയെ കീഴടക്കി.

ബയേണ്‍ രക്ഷപ്പെട്ടു
മ്യൂണിക്ക്: ചാംപ്യന്‍സ് ലീഗിന്റെ ക്വാര്‍ട്ടറില്‍ റയല്‍ മാഡ്രിഡിനോട് തോല്‍വി വഴങ്ങി പുറത്തായ ബയേണ്‍ മ്യൂണിക്കിന് സ്വന്തം തട്ടകമായ അലയന്‍സ് അരീനയില്‍ സമനില കുരുക്ക്. മെയ്ന്‍സ് അവരെ 2-2ന് സമനിലയില്‍ പിടിച്ചു. തോല്‍വിയുടെ വക്കില്‍ നിന്നാണ് ബാവേറിയന്‍സ് സമനില പിടിച്ച് രക്ഷപ്പെട്ടത്. മറ്റു മത്സരങ്ങളില്‍ ഹോഫെന്‍ഹെയിം- കൊളോണ്‍ പോരാട്ടം 1-1ന് സമനില. ഫ്രാങ്ക്ഫര്‍ട് 3-1ന് ഓഗ്‌സബര്‍ഗിനേയും ഡാംസ്റ്റഡ് 2-1ന് ഹാംബര്‍ഗറിനേയും ഹെര്‍ത 1-0ത്തിന് വോള്‍വ്‌സ് ബര്‍ഗിനേയും വെര്‍ഡര്‍ ബ്രമന്‍ 4-2ന് ഇംഗോള്‍സ്റ്റഡിനേയും കീഴടക്കി.

എവര്‍ട്ടന് സമനില
ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ എവര്‍ട്ടനെ വെസ്റ്റ് ഹാം യുനൈറ്റഡ് ഗോള്‍രഹിത സമനിലയില്‍ തളച്ചു. മറ്റു മത്സരങ്ങളില്‍ സ്വാന്‍സീ സിറ്റി- സ്റ്റോക് സിറ്റിയേയും ഹള്‍ സിറ്റി- വാട്‌ഫോര്‍ഡിനേയും 2-0ത്തിനും ബേണ്‍മൗത്ത് മിഡ്ഡ്ല്‍സ്‌ബ്രോയെ 4-0ത്തിനും പരാജയപ്പെടുത്തി.