ബാഴ്‌സലോണ: ലാലിഗയില്‍ ബാഴ്‌സലോണക്ക് മികച്ച ജയം. കഴിഞ്ഞ ദിവസം നടന്ന മത്സരത്തില്‍ 4-1 എന്ന സ്‌കോറിന് വിയ്യാറയലിനെയാണ് ബാഴ്‌സലോണ തകര്‍ത്തത്. സുവാരസിനും മെസ്സിക്കുമൊപ്പം അന്റോയിന്‍ ഗ്രിസ്മാന്‍ ആദ്യ ഇലവനില്‍ ഇറങ്ങിയപ്പോള്‍ സുന്ദര ഫുട്‌ബോളായിരുന്നു ബാഴ്‌സ കാഴ്ചവച്ചത്. 

മൂന്നാം മിനുട്ടില്‍ സെല്‍ഫ് ഗോളോടെയാണ് ബാഴ്‌സ മുന്നിലെത്തിയത്. എന്നാല്‍ 14ാം മിനുട്ടില്‍ നടത്തിയ കൗണ്ടര്‍ അറ്റാക്കില്‍ വിയ്യാറയല്‍ ജെറാഡ് മെറേനയിലൂടെ ഗോള്‍ തിരിച്ചടിച്ചു. 20ാം മിനുട്ടില്‍ മെസ്സിയുടെ അസിസ്റ്റില്‍ നിന്ന് സൂവാരസ് ലക്ഷ്യം കണ്ടതോടെ ബാഴ്‌സ വീണ്ടും ലീഡ് നേടി.

 45ാം മിനുട്ടില്‍ വീണ്ടും മെസ്സിയുടെ അസിസ്റ്റിലൂടെ അന്റോയിന്‍ ഗ്രിസ്മാനും ബാഴ്‌സക്ക് വേണ്ടി ഗോള്‍ നേടി. ഇതോടെ കളിയുടെ ആധിപത്യം മുഴുവന്‍ ബാഴ്‌സലോണ സ്വന്തമാക്കി. പിന്നീട് മികച്ച പൊസിഷന്‍ ഫുട്‌ബോളും ടിക്കിടാക്കയുമായിരുന്നു ബാഴ്‌സ കാഴ്ചവച്ചത്. 

പകരക്കാരനായി കളത്തിലെത്തിയ അന്‍സുഫാത്തിയും ബാഴ്‌സലോണക്ക് വേണ്ടി ഗോള്‍ നേടി. ഇതോടെ 34 മത്സരത്തില്‍ നിന്ന് ബാഴ്‌സക്ക് 73 പോയിന്റായി. ഒന്നാം സ്ഥാനത്തുള്ള റയല്‍ മാഡ്രിഡുമായി ബാഴ്‌സലോണക്ക് നാല് പോയിന്റിന്റെ വ്യത്യാസമാണ് ഇപ്പോഴുള്ളത്.