കാട്ടാക്കട: മഹാരാജാസ് കോളജിലെ എസ്.എഫ്.ഐ നേതാവ് അഭിമന്യുവിന്റെ കൊലപാതകത്തില്‍ പ്രതിഷേധിച്ച് ഫേസ്ബുക്ക് പോസ്റ്റിട്ട ഡി.വൈ.എഫ്.ഐ നേതാവിന്റെ വീടാക്രമിക്കുകയും വധ ഭീഷണി മുഴക്കുകയും ചെയ്ത സംഭവത്തില്‍ പൊലിസ് അന്വേഷണം ഊര്‍ജിതമാക്കി.
സൈബര്‍സെല്ലിന്റെ സഹായത്തത്തോടെ നമ്പറിന്റെ ഉടമയെ കണ്ടെത്താനുള്ള നീക്കവും പൊലിസ് നടത്തുന്നുണ്ട്. സംഭവത്തില്‍ എസ്.ഡി.പിഐയുടെ പ്രാദേശിക സഹായവും ലഭിച്ചിരുന്നതായി സൂചനയുണ്ട്. ഇതും പൊലിസ് അന്വേഷിക്കും.
പൂവച്ചല്‍ മേഖല കമ്മിറ്റിക്ക് കീഴിലുള്ള ആലമുക്ക് യൂനിറ്റ് സെക്രട്ടറി ശ്രീജിത്ത് ഫേസ്ബുക്ക് പോസ്റ്റ് ഇട്ടതിന് പിന്നാലെ ചില എസ്.ഡി.പി.ഐ പ്രവര്‍ത്തകര്‍ കമന്റുകളും ന്യായീകരണങ്ങളുമായി എത്തുകയായിരുന്നു. ഇതിന് പിന്നാലെ സി.പി.എം ഡി.വൈ.എഫ്.ഐ പ്രവര്‍ത്തകരും കമന്റുകളുമായി എത്തി. അതോടെ എന്നാല്‍ കാണാം എന്ന ഭീഷണി മുഴക്കി എസ്.ഡി.പി.ഐ പ്രവര്‍ത്തകര്‍ പിന്‍വലിഞ്ഞു. ശനിയാഴ്ച രാവിലെ 11ന് ശ്രീജിത്തിന് കോള്‍ വരികയും പോസ്റ്റ് പിന്‍വലിച്ചില്ലെങ്കില്‍ കാര്യം വഷളാകും എന്ന് ഭീഷണി ഉയര്‍ത്തുകയും ചെയ്തു.
വീട്ടുകാരെ ഉള്‍പ്പടെ അക്രമിക്കും എന്നായിരുന്നു ഭീഷണി. പള്ളിമുക്ക് സ്വദേശികളായ അല്‍ അമീനെയും നൗഫലിനേയും ചെന്നു കാണാനും ഫോണില്‍ ഭീഷണിപ്പെടുത്തിയ ആള്‍ പറഞ്ഞുവെന്ന് ശ്രീജിത്ത് പൊലിസിനോട് പറഞ്ഞു. ഉടന്‍തന്നെ ശ്രീജിത്ത് പാര്‍ട്ടി നേതാക്കളെ കണ്ട് കാര്യം ധരിപ്പിക്കുകയും ചെയ്തു. പിന്നീട് ഫോണ്‍ കോള്‍ വന്ന നമ്പര്‍ ഉള്‍പ്പടെ കാണിച്ച് പൊലിസില്‍ പരാതി നല്‍കുകയും ചെയ്തു. എന്നാല്‍ പരാതി നല്‍കിയതിന് ശേഷം ഈ നമ്പറില്‍ വിളിച്ചെങ്കിലും ഫോണ്‍ സ്വിച്ച് ഓഫ് ചെയ്ത അവസ്ഥയില്‍ ആയിരുന്നു.
സൈബര്‍ സെല്ലിന്റെ വിശദമായ പരിശോധനയില്‍ ഫോണ്‍ നമ്പര്‍ കേരളത്തിന് പുറത്തെ മേല്‍വിലാസത്തില്‍ ഉള്ളതാണെന്നും തെളിഞ്ഞു. ഹൈദ്രാബാദിലെ അഡ്രസ്സില്‍ എടുത്ത സിം കാര്‍ഡില്‍ നിന്നാണ് ശ്രീജിത്തിന് കോള്‍ വന്നത്. അതിനു പിന്നാലെയാണ് വീടാക്രണം. അക്രമത്തിന് തൊട്ടു മുന്‍പ് വീടിന്റെ പരിസരത്ത് കറണ്ട് പോവുകയും പെട്ടെന്ന് മതിലിന്റെ ഭാഗത്ത് നിന്ന് വീടിന്റെ മേല്‍ക്കൂരയിലേക്ക് കല്ലെറിയുകയും തെറി വിളിക്കുകയുമായിരുന്നു.
കല്ലേറില്‍ വീടിന്റെ മേല്‍ക്കൂര തകര്‍ന്നു. സംഭവം ഉണ്ടായതിന് പിന്നാലെ ശ്രീജിത്തിന്റെ അമ്മയ്ക്ക് ദേഹാസ്വസ്ഥ്യം അനുഭവപ്പെടുകയും ചെയ്തു. ശ്രീജിത്ത് വീടിന് പുറത്തേക്ക് ഇറങ്ങിയതോടെ അക്രമി സംഘം ബൈക്കുകളില്‍ സ്ഥലത്ത് നിന്ന് രക്ഷപ്പെടുകയായിരുന്നു.