ഒരു ഐഡിയയുമില്ലാതെ പ്രവര്‍ത്തിച്ചാല്‍ എങ്ങനെയിരിക്കുമെന്ന് കാണിച്ചുതരികയാണ് തമിഴ്‌നാട് മന്ത്രി കെ രാജു. ചൂടുകാലത്ത് ബാഷ്പീകരണം തടയുന്നതിനു വേണ്ടി അണക്കെട്ടില്‍ തെര്‍മൊക്കോള്‍ നിരത്തിയാണ് മന്ത്രി പെട്ടത്. വൈഗൈ അണക്കെട്ടിലാണ് മന്ത്രിയുടെ മണ്ടന്‍ പരീക്ഷണം.

തെര്‍മോക്കോള്‍ ചാര്‍ട്ടുകള്‍ സെല്ലോ ടാപ്പുകള്‍ കൊണ്ട് ഒട്ടിച്ച് വെള്ളത്തില്‍ ഇടുകയായിരുന്നു. എന്നാല്‍ ചെറുതായൊന്ന് കാറ്റുവീശിയപ്പോള്‍ തെര്‍മൊക്കോള്‍ എല്ലാം പറന്നുപോയി. ഒട്ടിച്ചതെല്ലാം ഇളകിപ്പോവുകയും വെള്ളത്തില്‍ ഒഴുകിനടക്കുകയും ചെയ്തു. പത്തുലക്ഷം രൂപയാണ് തെര്‍മൊക്കോള്‍ പരീക്ഷണത്തിലൂടെ പാഴായിപ്പോയത്.

ഒഴുകിനടന്ന തെര്‍മൊക്കോളുകള്‍ പിന്നീട് തോണികളില്‍ പോയി തിരിച്ചെടുക്കേണ്ടി വന്നു. തെര്‍മൊക്കോള്‍ വലിയ പാരിസ്ഥിതിക പ്രശ്‌നമുണ്ടാക്കുമെന്നും പൊടിഞ്ഞാല്‍ പ്രശ്‌നമുണ്ടാവുമെന്നും മാധ്യപ്രവര്‍ത്തകര്‍ ചൂണ്ടിക്കാട്ടിയപ്പോള്‍, പരീക്ഷണാടിസ്ഥാനത്തില്‍ മാത്രമാണിതു ചെയ്തതെന്നു പറഞ്ഞ് മന്ത്രി ഒഴിഞ്ഞുമാറി.

തെര്‍മൊക്കോള്‍ പരീക്ഷണം പാളിയതോടെ പ്ലാസ്റ്റിക് പന്തുകള്‍ വെള്ളത്തിലിടാനാണ് മന്ത്രിയുടെ തീരുമാനം. ബാഷ്പീകരണം തടയാന്‍ പ്ലാസ്റ്റിക് പന്തുകളിടുന്ന പദ്ധതി പല രാജ്യങ്ങളിലും വിജയിച്ചതാണ്. കറുത്ത പന്തുകളാണ് വെള്ളത്തിന്റെ ഉപരിതലത്തില്‍ ഇടുന്നത്.

[caption id="attachment_308086" align="aligncenter" width="630"] ലോസ് ആഞ്ചല്‍സിലെ അണക്കെട്ടില്‍ ഇട്ട പ്ലാസ്റ്റിക് പന്തുകള്‍. 96 മില്യണ്‍ പന്തുകളാണ് ഇവിടെ ഉപയോഗിച്ചത്. പന്തിന്റെ സഹായത്തോടെ വര്‍ഷത്തില്‍ 300 മില്യണ്‍ ഗാലന്‍ ജല ബാഷ്പീകരണം തടയാനാവുന്നുണ്ട്.[/caption]