മേപ്പാടി: ഡി.എം വിംസ് മെഡിക്കല്‍ കോളജിലെ 2013 ബാച്ചില്‍ വിജയികളായ 130 ഡോക്ടര്‍മാരെ കേരളാ ഗവര്‍ണറും ആരോഗ്യ സര്‍വകലാശാല ചാന്‍സലറുമായ ജസ്റ്റിസ്(റിട്ട.) പി. സദാശിവം നാടിന് സമര്‍പ്പിച്ചു. അഞ്ചര വര്‍ഷംകൊണ്ട് നിങ്ങള്‍ പഠിച്ചത് ഈ മേഖലയെ സംബന്ധിച്ച് നാലിലൊന്ന് മാത്രമാണെന്നും തുടര്‍ന്നുള്ള നിങ്ങളുടെ പരിശ്രമങ്ങളിലൂടെ മാത്രമേ അതിന്റെ പൂര്‍ണ്ണതയില്‍ എത്താന്‍ കഴിയുകയുള്ളൂ എന്നും മുഖ്യാഥിതിയായി സംസാരിച്ച കേരള ആരോഗ്യ സര്‍വകലാശാല പ്രൊ-വൈസ് ചാന്‍സലര്‍ ഡോ. എ. നളിനാക്ഷന്‍ പറഞ്ഞു. മറ്റുള്ളവരെ സഹായിക്കുവാനുള്ള ഒരു സുവര്‍ണാവസരമാണിതെന്നും പ്രകൃതി രമണീയമായ വയനാട്ടില്‍ പഠിക്കാന്‍ കഴിഞ്ഞത് നിങ്ങളുടെ ഭാഗ്യമാണെന്നും അദേഹം പറഞ്ഞു. 1987ല്‍ ആരംഭിച്ച, 32 വര്‍ഷങ്ങള്‍ പിന്നിട്ട തന്റെ ആരോഗ്യ മേഖലയിലൂടെയുള്ള ദീര്‍ഘയാത്രയിലെ മറ്റൊരു നാഴികക്കല്ലാണിതെന്ന് ചടങ്ങിന് സ്വാഗതം ആശംസിച്ചുകൊണ്ട് സംസാരിച്ച ഡി.എം ഹെല്‍ത്ത് കെയറിന്റെയും, ഡി.എം എഡ്യൂക്കേഷന്‍ ആന്‍ഡ് റിസര്‍ച്ച് ഫൗഡേഷന്റെയും ചെയര്‍മാന്‍ ഡോ. ആസാദ് മൂപ്പന്‍ പറഞ്ഞു. തുടര്‍ന്ന് പ്രതിജ്ഞാ വാചകം ഡീന്‍ പ്രൊഫ. ആന്റണി സില്‍വന്‍ ഡിസൂസ ചൊല്ലിക്കൊടുത്തു. പി.വി അബ്ദുല്‍ വഹാബ് എം.പി, ഗൂഡല്ലൂര്‍ എം.എല്‍.എ എ. ദ്രാവിഡമണി, ജില്ലാ പഞ്ചായത്ത് പ്രസിഡന്റ് കെ.ബി നസീമ, കല്‍പ്പറ്റ ബ്ലോക്ക് പഞ്ചായത്ത് പ്രസിഡന്റ് ഉഷാ തമ്പി, വിവിധ പഞ്ചായത്ത് പ്രസിഡന്റുമാരായ ആര്‍. യമുന, കെ.കെ സഹദ്, ലീല ജോസഫ്, ഡോക്ടര്‍ മൂപ്പന്‍സ് റിസര്‍ച്ച് ഫൗണ്ടേഷന്‍ വൈസ് ചെയര്‍മാന്‍ നസീറ ആസാദ്, ട്രസ്റ്റി ഡോ. സെബ മൂപ്പന്‍, ടി.ജെ വില്‍സണ്‍, ഡോ. ഹരീഷ് പിള്ള, എക്‌സിക്യൂട്ടീവ് ട്രസ്റ്റി യു. ബഷീര്‍, പ്രൊഫ. കാര്‍ത്തികേയ വര്‍മ്മ, എക്‌സിക്യൂട്ടീവ് ട്രസ്റ്റി ഡോ. ഹംസ പി.എം, ചീഫ് അഡ്മിനിസ്‌ട്രേറ്റര്‍ ദേവാനന്ദ് കെ.ടി, മലബാര്‍ ഗോള്‍ഡ് ചെയര്‍മാന്‍ എം.പി അഹമ്മദ്, പി.ടി.എ പ്രസിഡന്റ് ഡോ. നൗഷാദ് പള്ളിയാല്‍, അഡ്വ. പി. ചാത്തുക്കുട്ടി, ഡോ. ടി.പി.വി സുരേന്ദ്രന്‍ ചടങ്ങില്‍ പങ്കെടുത്തു. ഇന്റേണ്‍സ് റപ്രസെന്റേറ്റീവ് ഡോ. ജവാദ് അഹമ്മദ് ചടങ്ങിന് നന്ദി പറഞ്ഞു.