കട്ടപ്പന: ഇ.എസ്. ബിജിമോള്‍ എംഎല്‍എയുടെ സഹോദരി ഇ.എസ്. ജിജിമോള്‍ പ്രസിഡന്റായ സ്മാര്‍ട്ട് പീരുമേട് ഇന്റഗ്രേറ്റഡ് ആന്‍ഡ് കോംപിറ്റിറ്റീവ് എഡ്യുക്കേഷണല്‍ സൊസൈറ്റി (സ്‌പൈസസ്) എന്ന സംഘത്തിന്റെ പേരില്‍ ഉന്നയിക്കപ്പെട്ട ആരോപണങ്ങള്‍ക്ക് മറുപടി നല്കിയതില്‍തന്നെ എംഎല്‍എയുടെ കുറ്റസമ്മതമുണ്ടെന്ന് ഡിസിസി പ്രസിഡന്റ് ഇബ്രാഹിംകുട്ടി കല്ലാര്‍ പത്രസമ്മേളനത്തില്‍ പറഞ്ഞു. ഇക്കാര്യത്തില്‍ ആരോപണങ്ങള്‍ക്ക് വനംമന്ത്രി കൂടി മറുപടി പറയണമെന്ന് അദ്ദേഹം ആവശ്യപ്പെട്ടു. കാട്ടാന അക്രമത്തില്‍ അഞ്ചുപേര്‍ കൊല്ലപ്പെട്ടിട്ടും അവരുടെ ആശ്രിതര്‍ക്ക് സഹായം അനുവദിക്കാത്ത വനംവകുപ്പാണ് ഇത്തരം തട്ടിപ്പുകള്‍ക്ക് കൂട്ടുനില്‍ക്കുന്നത്. 

പെരിയാര്‍ ടൈഗര്‍ കണ്‍സര്‍വേഷന്‍ ഫൗണ്ടേഷന്റെ ഇടപാടുകള്‍ മുഴുവന്‍ വകുപ്പുതല അന്വേഷണം നടത്തണമെന്നാവശ്യപ്പെട്ട് ഡിസിസി മുഖ്യമന്ത്രിക്ക് കത്തുനല്‍കുമെന്നും അദ്ദേഹം അറിയിച്ചു.
ഇക്കാര്യത്തില്‍ സിപിഎം, സിപിഐ നേതൃത്വങ്ങള്‍ വിശദീകരണം നല്‍കണം.സംഭവത്തെക്കുറിച്ച് അന്വേഷണം നടത്തണമെന്നാവശ്യപ്പെട്ട് കോണ്‍ഗ്രസ് ബ്ലോക്ക് കമ്മിറ്റിയുടെ ആഭിമുഖ്യത്തില്‍ 17-ന് പെരിയാര്‍ ടൈഗര്‍ റിസര്‍വ് ഡപ്യൂട്ടി ഡയറക്ടറുടെ ഓഫീസിലേയ്ക്ക് മാര്‍ച്ചുനടത്തുമെന്നും ഡിസിസി പ്രസിഡന്റ് അറിയിച്ചു.