കോഴിക്കോട്: വാണിമേലില്‍ പാക്കോയി പാലത്തിന്റെ ഉദ്ഘാടന ചടങ്ങിനിടെ പടക്കം പൊട്ടിക്കുന്നതിനെച്ചൊല്ലി നാട്ടുകാര്‍ ചേരി തിരിഞ്ഞ് ഏറ്റുമുട്ടി. 2018ലെ പ്രളയത്തില്‍ തകര്‍ന്ന് പുനര്‍നിര്‍മ്മിച്ച പാലം ഇ.കെ വിജയന്‍ എം.എല്‍.എ ഉദ്ഘാടനം ചെയ്യുന്നതിനിടെയാണ് നാടകീയ സംഭവങ്ങള്‍ അരങ്ങേറിയത്. നരിപ്പറ്റ പഞ്ചായത്ത് ഭാഗത്തെ അപ്രോച്ച് റോഡിന്റെ നിര്‍മ്മാണം പൂര്‍ത്തിയാകുന്നതിന് മുന്‍പേ പാലം ഉദ്ഘാടനം ചെയ്യുന്നതിനെച്ചൊല്ലി പ്രദേശത്ത് നേരത്തെ തന്നെ തര്‍ക്കങ്ങള്‍ നിലനിന്നിരുന്നു. വാണിമേല്‍ ഭാഗത്തെ നിര്‍മാണ പ്രവര്‍ത്തനങ്ങള്‍ പൂര്‍ത്തിയായപ്പോള്‍ നരിപ്പറ്റ ഭാഗത്തെ റോഡ് പണി അപൂര്‍ണമായി കിടക്കുന്നതിനെതിരെ നാട്ടുകാര്‍ പ്രതിഷേധം സംഘടിപ്പിച്ചിരുന്നു.

ALSO READ: പുതുവൈപ്പിനിൽ മത്സ്യബന്ധന ബോട്ട് മറിഞ്ഞു: ഒരാൾ മരിച്ചു

ഉദ്ഘാടന ചടങ്ങുകള്‍ക്കിടെ പ്രതിഷേധം നടന്ന നരിപ്പറ്റ ഭാഗത്ത് ചിലര്‍ പടക്കം പൊട്ടിക്കാന്‍ ശ്രമിച്ചതാണ് പെട്ടെന്നുള്ള സംഘര്‍ഷത്തിന് കാരണമായത്. ഇത് പ്രതിഷേധക്കാര്‍ തടഞ്ഞതോടെ ഇരു വിഭാഗവും തമ്മില്‍ വാക്കേറ്റമുണ്ടാവുകയും അത് വലിയ തോതിലുള്ള കൈയാങ്കളിയിലേക്കും കൂട്ടത്തല്ലിലേക്കും നീങ്ങുകയുമായിരുന്നു. റോഡ് പണി പൂര്‍ത്തിയാക്കാത്തതിലെ അതൃപ്തിയും രാഷ്ട്രീയപരമായ തര്‍ക്കങ്ങളുമാണ് പടക്കം പൊട്ടിക്കുന്നതിനെച്ചൊല്ലിയുള്ള സംഘര്‍ഷമായി മാറിയത്. സംഭവത്തെത്തുടര്‍ന്ന് പ്രദേശത്ത് നേരിയ സംഘര്‍ഷാവസ്ഥ നിലനിന്നു.

The inauguration of the Pakkoyi bridge in Kozhikode turned into a violent physical brawl between two groups of locals following a dispute over bursting firecrackers amid protests against the incomplete approach road.