ലക്‌നൗ: വികാസ് ദുബെ കൊല്ലപ്പെട്ടതിനു പിന്നാലെ ഉത്തര്‍പ്രദേശ് പൊലിസിന്റെ വിശദീകരണത്തില്‍ സംശയം പ്രകടിപ്പിച്ച് പ്രമുഖരടക്കം രംഗത്തെത്തിയിരിക്കുകയാണ്. ഇവര്‍ ഉന്നയിക്കുന്ന ചോദ്യങ്ങള്‍ക്കു വ്യക്തമായ മറുപടി നല്‍കാന്‍ പൊലിസിനു സാധിച്ചിട്ടുമില്ല.

അപകടത്തില്‍പെട്ട വാഹനത്തിലായിരുന്നില്ല വികാസ് ദുബെ ഉണ്ടായിരുന്നതെന്നാണ് പ്രധാന ആരോപണം. കൊല്ലപ്പെടുന്നതിന് ഒരു മണിക്കൂര്‍ മാത്രം മുന്‍പ് ഇവിടത്തെ ഒരു ടോള്‍പ്ലാസയിലെ സി.സി.ടി.വിയില്‍ പതിഞ്ഞ ചിത്രത്തില്‍ ദുബെ മറ്റൊരു വാഹനത്തിലായിരുന്നു. സംഭവത്തിന് അര മണിക്കൂര്‍ മാത്രം മുന്‍പ്, ദുബെയെ കൊണ്ടുപോയ പൊലിസ് സംഘത്തിനു പിന്നാലെയുണ്ടായിരുന്ന മാധ്യമപ്രവര്‍ത്തകരെ പൊലിസ് തടഞ്ഞിരുന്നു. ഇതിന്റെ വിഡിയോ പുറത്തായിട്ടുണ്ട്. 

ഏറ്റുമുട്ടല്‍ നടന്നെന്നു പറയുന്ന സ്ഥലത്തുനിന്ന് മൂന്നു കിലോമീറ്റര്‍ മുന്‍പുതന്നെ മാധ്യമപ്രവര്‍ത്തകരെ തടഞ്ഞതും ദുരൂഹതയുണര്‍ത്തുന്നു.

അതോടൊപ്പം, പ്രദേശത്ത് ഒരു വാഹനാപകടം നടന്നതായി അടയാളങ്ങളില്ലെന്നു മാത്രമല്ല, അപകടത്തിന്റെ ശബ്ദം കേട്ടില്ലെന്നും വെടിയൊച്ചകള്‍ മാത്രമാണ് കേട്ടതെന്നും പ്രദേശവാസികള്‍ പറയുന്നു. കൊലപാതകങ്ങളടക്കം 60ലേറെ കേസുകളില്‍ പ്രതിയായ ഗുണ്ടാ നേതാവിനെ അറസ്റ്റ് ചെയ്തു കൊണ്ടുപോകുമ്പോള്‍ വിലങ്ങണിയിക്കാതിരുന്നത് എന്തുകൊണ്ടെന്ന ചോദ്യവും ഉയരുന്നുണ്ട്. വിലങ്ങണിയിച്ചിരുന്നെങ്കില്‍ ദുബെയ്ക്ക് തോക്ക് കൈക്കലാക്കാനും രക്ഷപ്പെടാന്‍ ശ്രമിക്കാനും സാധിക്കില്ലായിരുന്നു. ദേശീയപാതയില്‍നിന്നു നിയന്ത്രണം തെറ്റി മറിഞ്ഞ കാറില്‍നിന്നു ദുബെ തോക്ക് തട്ടിയെടുത്ത് രക്ഷപ്പെടാന്‍ ശ്രമിച്ചെന്ന വാദവും പലരും ചോദ്യം ചെയ്യുന്നുണ്ട്.