തളിപ്പറമ്പ് : ദുരൂഹസാഹചര്യത്തില്‍ തളിപ്പറമ്പ് ഇരിട്ടി സംസ്ഥാന പാതയില്‍ ചൊറുക്കള വെള്ളാരംപാറയില്‍ കണ്ടെത്തിയ രണ്ട് ബൈക്കുകള്‍ തളിപ്പറമ്പ് പൊലിസ് കസ്റ്റഡിയിലെടുത്തു. ഇന്നലെ പുലര്‍ച്ചെ പട്രോളിംഗ് നടത്തുകയായിരുന്ന പൊലിസിനെ കണ്ടയുടനെ ബൈക്കുകളുടെ സമീപത്തു നിന്നവര്‍ ഓടി രക്ഷപ്പെടുകയായിരുന്നുവെന്ന് പൊലിസ് പറഞ്ഞു. കെ.എ 18 ഡബ്ല്യു 0464, കെ.എ 45ഇ 9823 പള്‍സര്‍ ബൈക്കുകളും മൂന്ന് ഹെല്‍മറ്റുകളും ബൈക്കില്‍ സൂക്ഷിച്ചിരുന്ന രണ്ട് മൊബൈല്‍ ഫോണുകളും പൊലിസ് കസ്റ്റഡിയിലെടുത്തു. കര്‍ണാടക മോട്ടോര്‍ വകുപ്പുമായും സൈബര്‍സെല്ലുമായും ബന്ധപ്പെട്ട് പൊലിസ് അന്വേഷണം ആരംഭിച്ചു. കുഴല്‍പ്പണം കടത്തുന്നതിനോ, അക്രമങ്ങള്‍ ആസൂത്രണം ചെയ്യുന്നതിനോ എത്തിയവരാണോ ഇവരെന്ന് സംശയിക്കുന്നു. മൊബൈല്‍ ഫോണ്‍ കേന്ദ്രീകരിച്ചുള്ള അന്വേഷണത്തില്‍ കൂടുതല്‍ വിവരം ലഭിക്കുമെന്ന പ്രതീക്ഷയിലാണ് പൊലിസ്.