കൊല്ലം: മസാല ബോണ്ട് വിഷയത്തില്‍ പ്രതിപക്ഷ ആരോപണങ്ങള്‍ക്കെതിരേ ധനമന്ത്രി തോമസ് ഐസക് രംഗത്ത്. പ്രതിപക്ഷം ബോധപൂര്‍വം വിവാദങ്ങള്‍ സൃഷ്ടിച്ച് വികസനത്തെ തകര്‍ക്കുകയാണെന്ന് തോമസ് ഐസക് മാധ്യമങ്ങളോട് പറഞ്ഞു. അന്ധമായ വികസന വിരോധമാണ് ഇതിനുപിന്നില്‍. തന്റെ ആദ്യ ബജറ്റ് പ്രസംഗത്തില്‍തന്നെ മസാല ബോണ്ടിനെക്കുറിച്ച് വിശദമായി പറഞ്ഞിട്ടുണ്ട്.

പ്രതിപക്ഷ നേതാവ് ഇതുവരെ ബജറ്റ് പഠിച്ചിട്ടില്ല. പണം കടമെടുത്താല്‍ പലിശ നല്‍കേണ്ടിവരും. എല്ലാസമയത്തും വാങ്ങിയ ആളിന്റെ കൈയില്‍ത്തന്നെ ബോണ്ട് ഇരിക്കണമെന്നില്ല. ഇന്ന് ബോണ്ട് വാങ്ങിയ ആളിന് അടുത്ത ദിവസം മറിച്ചുവില്‍ക്കാം. മസാല ബോണ്ടിലെ കമ്മിഷന്‍ ആര്‍ക്കെന്ന മുന്‍മന്ത്രി ഷിബു ബേബിജോണിന്റെ ആരോപണത്തിന് കമ്മിഷന്‍ വാങ്ങിയവര്‍ക്ക് മാത്രമേ അതിനെക്കുറിച്ച് പറയാന്‍ പറ്റൂവെന്നും തോമസ് ഐസക് പറഞ്ഞു.