ടെല്‍അവീവ്: പാര്‍ലമെന്റിലേക്കുള്ള തെരഞ്ഞെടുപ്പില്‍ ഇസ്‌റാഈല്‍ ജനത വിധിയെഴുതി. പ്രധാനമന്ത്രി നെതന്യാഹുവിന്റെ ലിക്കുഡ്, മുന്‍ സൈനിക മേധാവി ചീഫ് ബെന്നി ഗാന്‍സെയുടെ ബ്ലു ആന്‍ഡ് വൈറ്റ് എന്നീ പാര്‍ട്ടികള്‍ തമ്മിലാണ് 120 പാര്‍ലമെന്റ് സീറ്റിലേക്കുള്ള തെരഞ്ഞെടുപ്പിലെ മുഖ്യ എതിരാളികള്‍.
10,000 പോളിങ് സ്റ്റേഷനുകളിലായി 6.3 ദശലക്ഷം ജനങ്ങളാണ് ഇന്നലെ വോട്ട് രേഖപ്പെടുത്തിയത്. 40ല്‍ കൂടുതല്‍ പാര്‍ട്ടികള്‍ തെരഞ്ഞെടുപ്പില്‍ മത്സരിക്കുന്നുണ്ട്. ഒടുവിലെ റിപ്പോര്‍ട്ടുകള്‍ പ്രകാരം 42.8 ശതമാനം പോളിങ്ങുണ്ടായെന്നാണ് വിവരം. 2015ല്‍ 45.4 ശതമാനം പോളിങ്ങാണ് രേഖപ്പെടുത്തിയത്.
ഒരു പാര്‍ട്ടിക്കും സ്വന്തമായി ഭൂരിപക്ഷം നേടാനുള്ള 61 സീറ്റുകള്‍ നേടാനാവില്ലെന്നും ചെറു കക്ഷികളെ കൂട്ടുപിടിക്കേണ്ടുവരുമെന്നുമാണ് പോളിങ് സര്‍വേകള്‍ വ്യക്തമാക്കുന്നത്. വെള്ളിയാഴ്ചയാണ് തെരഞ്ഞെടുപ്പ് ഫലം പൂര്‍ണമായി പ്രസിദ്ധീകരിക്കുക.

പാര്‍ലമെന്റിലേക്ക് നടന്ന തെരഞ്ഞെടുപ്പുകളില്‍ ഇതുവരെ ഒരു പാര്‍ട്ടിയും സ്വന്തമായി ഭൂരിപക്ഷം നേടിയിട്ടില്ല. ലിക്കുഡ്, ബ്ലൂ ആന്‍ഡ് വൈറ്റ് പാര്‍ട്ടികള്‍ 30 സീറ്റുകള്‍ നേടുമെന്നും ഇടതുപാര്‍ട്ടികളായ ലേബര്‍ പത്ത് സീറ്റുകള്‍ കരസ്ഥമാക്കുമെന്നും സര്‍വേകള്‍ പറയുന്നു.

അതിനിടെ ഇന്നലെ നടന്ന തെരഞ്ഞെടുപ്പില്‍ അറബ് മണ്ഡലങ്ങളില്‍ ലിക്കുഡ് പാര്‍ട്ടി രഹസ്യ കാമറകള്‍ ഘടിപ്പിച്ചെന്ന് ആരോപണം ഉയര്‍ന്നിട്ടുണ്ട്. തെരഞ്ഞെടുപ്പ് സംവിധാനത്തെ നേരിട്ട് തകര്‍ക്കാനുള്ള ശ്രമങ്ങളാണ് ലിക്കുഡ് പാര്‍ട്ടി രഹസ്യ കാമറ സ്ഥാപിക്കലിലൂടെ നടത്തിയതെന്ന് അറബ് പാര്‍ട്ടി നേതാവ് അഹമ്മദ് തബി പറഞ്ഞു. സംഭവത്തില്‍ അന്വേഷണം നടത്തുമെന്ന് തെരഞ്ഞെടുപ്പ് കമ്മിഷന്‍ പറഞ്ഞു.
അതേസമയം സമാധാനത്തിനായുള്ള കൈകള്‍ ഇപ്പോഴും തങ്ങള്‍ നീട്ടിയിരിക്കുകയാണെന്ന് ഫലസ്തീന്‍ പ്രസിഡന്റ് മഹ്മൂദ് അബ്ബാസ് പറഞ്ഞു. വരുന്ന സര്‍ക്കാരുകള്‍ ചര്‍ച്ചകള്‍ക്ക് തയാറാവുമെന്നാണ് പ്രതീക്ഷയെന്ന് അദ്ദേഹം റാമല്ലയില്‍ പറഞ്ഞു.