കൊച്ചി: മഹാരാജാസ് കോളജിലെ എസ്.എഫ്.ഐ നേതാവ് അഭിമന്യുവിനെ കുത്തിക്കൊലപ്പെടുത്തിയ കേസില്‍ ഒരാളെകൂടി കസ്റ്റഡിയിലെടുത്തു. ഗൂഢാലോചനയില്‍ പങ്കെടുത്ത പോപുലര്‍ ഫ്രണ്ട് പ്രവര്‍ത്തകനെയാണ് അന്വേഷണ സംഘം കസ്റ്റഡിയിലെടുത്തത്.
ഇയാളുടെ അറസ്റ്റ് ഇന്ന് രേഖപ്പെടുത്തും. ഇതോടെ കേസില്‍ പോപുലര്‍ഫ്രണ്ട്-എസ്.ഡി.പി.ഐക്കാരായ ഏഴുപേരെയാണ് പൊലിസ് അറസ്റ്റ് ചെയ്തത്. അതേസമയം, കേസുമായി ബന്ധപ്പെട്ട് അഞ്ചുപേര്‍കൂടി കസ്റ്റഡിയിലുണ്ടെന്ന് സൂചനയുണ്ട്. ഇവരെ ചോദ്യം ചെയ്്തുവരികയാണ്. കേസിലെ പ്രതികളില്‍ ചിലര്‍ വ്യാജ പാസ്‌പോര്‍ട്ട് ഉപയോഗിച്ച് വിദേശത്തേക്ക് കടന്നതായി സൂചനയില്ലെന്ന് സിറ്റി പൊലിസ് കമ്മിഷണര്‍ എം.പി ദിനേശ് പറഞ്ഞു.
വിമാനത്താവളങ്ങളില്‍ പരിശോധന കര്‍ശനമാക്കിയിട്ടുണ്ട്. ഇതുവരെ അറസ്റ്റിലായ പ്രതികള്‍ക്കെതിരേ യു.എ.പി.എ ചുമത്തിയിട്ടില്ലെന്നും ആവശ്യമെങ്കില്‍ പിന്നീട് തീരുമാനിക്കുമെന്നും കമ്മിഷണര്‍ പറഞ്ഞു. അതേസമയം, ഹാദിയ വിഷയത്തില്‍ ഹൈക്കോടതിയിലേക്ക് മാര്‍ച്ച് നടത്തിയ കേസില്‍ കഴിഞ്ഞ ദിവസം അറസ്റ്റിലായ അനസിനെ ഇന്ന് കസ്റ്റഡിയില്‍ വാങ്ങും. അഭിമന്യു വധ ഗൂഢാലോചനയില്‍ പങ്കാളിയാണ് ഇയാള്‍.