അല്‍ഖഫ്ജി: ഏജന്റ് നല്‍കിയ വാഗ്ദാനങ്ങളില്‍ വിശ്വസിച്ച് വന്‍തുക നല്‍കി സഊദിയിലെത്തി നിയമക്കുരുക്കിലായ മൂന്നുമലയാളികളെ ഇന്ത്യന്‍ എംബസിയുടെയും സാമൂഹ്യപ്രവര്‍ത്തകരുടെയും സഹായത്തോടെ നാട്ടിലേക്കയച്ചു.

കൊല്ലം പിറവന്തൂര്‍ സ്വദേശി അഖില്‍, ചിത്താര സ്വദേശി സജീര്‍, കണ്ണൂര്‍ മൊകേരി സ്വദേശി വൈശാഖ് എന്നിവരാണ് ഇടനിലക്കാരുടെ ചതിയില്‍പ്പെട്ടത്.

കുടിവെള്ളം സപ്ലൈ ചെയ്യുന്ന കമ്പനിയില്‍ ഡ്രൈവറുടെ ജോലിയും മൂവായിരം റിയാല്‍ ശമ്പളവും സൗജന്യഭക്ഷണവും താമസവും ഉള്‍പ്പടെ മറ്റാനുകൂല്യങ്ങളും നല്‍കാമെന്നു പറഞ്ഞാണ് ഇടനിലക്കാരനായ മലയാളി വന്‍തുക വാങ്ങി വിസ നല്‍കിയത്. വിസയ്ക്കുവേണ്ടി അഖില്‍ എഴുപതിനായിരം രൂപയും, സജീര്‍ അറുപത്തി അയ്യായിരവും, വൈശാഖ് മുപ്പത്തി അയ്യായിരം രൂപയും എജന്റിനു നല്‍കി.

എന്നാല്‍ സൗദിയില്‍ എത്തിയ ഇവര്‍ക്കു പറഞ്ഞ ജോലി ലഭിച്ചില്ലെന്നു മാത്രമല്ല ദിവസങ്ങളോളം മതിയായ താമസസൗകര്യവും ലഭിച്ചിരുന്നില്ല. കുടിവെള്ള വിതരണത്തിനു പകരം മാലിന്യം കൊണ്ടുപോകുന്ന വാഹനം ഓടിക്കുന്ന ജോലിയാണ് ഇവര്‍ക്കു ലഭിച്ചത്. അഖിലിനൊഴികെ ആര്‍ക്കും സൗദി ഡ്രൈവിങ് ലൈസന്‍സ് ഇല്ലായിരുന്നു. ബാക്കിയുള്ളവര്‍ക്കു ലൈസന്‍സ് എടുത്തുനല്‍കാനും സ്‌പോണ്‍സര്‍ തയാറായില്ല.
തുടര്‍ന്നു ലൈസന്‍സ് ഇല്ലാത്തതിനാലും വാഹനത്തിനു ആവശ്യമായ രേഖകള്‍ ഇല്ലാത്തതിനാലും നാലായിരത്തോളം റിയാല്‍ പിഴയായി ലഭിച്ചു.
രണ്ടുമാസം ജോലി ചെയ്തിട്ടും ഇവര്‍ക്കു ശമ്പളമായി ഒന്നും ലഭിച്ചിരുന്നില്ല.

പ്രതിഷേധസൂചകമായി ജോലിയില്‍നിന്നു വിട്ടുനിന്നെങ്കിലും സ്‌പോണ്‍സര്‍ യാതൊരു ഒത്തുതീര്‍പ്പിനും തയാറായിരുന്നില്ല. തുടര്‍ന്നു ഇന്ത്യന്‍ എംബസി ഹെല്‍പ്പ് ഡെസ്‌ക് കോഡിനേറ്ററുടെ നിര്‍ദേശപ്രകാരം തൊഴിലുടമയ്‌ക്കെതിരേ പരാതി നല്‍കി. പിന്നീട് സ്‌പോണ്‍സറെ വിളിച്ചുവരുത്തി ശക്തമായി വിമര്‍ശിച്ച ലേബര്‍ ഓഫിസര്‍ ഇവരുടെ പിഴസംഖ്യ അടക്കുവാനും നാട്ടിലേയ്ക്കു അയക്കാനും ഉത്തരവിടുകയായിരുന്നു.

പിന്നീട് എംബസിയുടെ സമ്മര്‍ദത്തെ തുടര്‍ന്നു വിസനല്‍കിയവര്‍ ഇവര്‍ക്ക് നാട്ടിലേയ്ക്കു മടങ്ങുന്നതിനു ആവശ്യമായ തുക നല്‍കുകയായിരുന്നു.