മുത്തങ്ങ: വാഹന പരിശോധനക്കിടെ പച്ചക്കറി ചാക്കുകള്‍ക്കിടയില്‍ ഒളിപ്പിച്ചു കടത്താന്‍ ശ്രമിച്ച നിരോധിത പുകയില ഉല്‍പ്പന്നം മുത്തങ്ങ എക്‌സൈസ് ചെക്ക് പോസ്റ്റ് അധികൃതര്‍ പിടികൂടി.  സംഭവത്തില്‍ വാഹന ഡ്രൈവറും പെരുമ്പാവൂര്‍ മുടിക്കല്‍ സ്വദേശിയുമായ സുബൈര്‍ (37)നെ കസ്റ്റഡിയിലെടുത്തു. ഇയാള്‍ ഓടിച്ചിരുന്ന പിക്കപ്പ് ജീപ്പില്‍ പച്ചക്കറി ചാക്കുകള്‍ക്കിടയിലാണ് നിരോധിത പുകയില ഉല്‍പ്പന്നമായ ഹാന്‍സ് സൂക്ഷിച്ചിരുന്നത്. പരിശോധനയില്‍ 18,000 പാക്കറ്റ് ഹാന്‍സാണ് പിടകൂടിയത്.
ഇതിന് മാര്‍ക്കറ്റില്‍ ഒന്‍പത് ലക്ഷം രൂപ വിലമതിക്കുമെന്ന് എക്‌സൈസ് അധികൃതര്‍ പറഞ്ഞു. മൈസൂരില്‍ നിന്നും പെരുമ്പാവൂരിലേക്കാണ് സാധനം കൊണ്ടു പോകുന്നതെന്ന് ചോദ്യം ചെയ്യലില്‍ സുബൈര്‍ പറഞ്ഞതായി അധികൃതര്‍ വ്യക്തമാക്കി. എക്‌സൈസ് സര്‍ക്കിള്‍ ഇന്‍പെക്ടര്‍ ടി.എം മജുവിന്റെ നേതൃത്വത്തില്‍ പി.ഇ.ഒമാരായ ടി.എ പ്രകാശന്‍, എ.എം ലത്തീഫ്, കെ. റഷീദ് എന്നിവരാണ് പരിശോധന നടത്തിയത്.