തിരുവനന്തപുരം: കേരളാ സ്‌റ്റേറ്റ് ഗവണ്‍മെന്റ് ആയുര്‍വേദ മെഡിക്കല്‍ ഓഫിസേഴ്‌സ് അസോസിയേഷന്റെ 36ാമത് സംസ്ഥാന സമ്മേളനവും 60 ാമത് വാര്‍ഷികാഘോഷങ്ങളുടെ സമാപനവും ഇന്നും നാളെയുമായി തലസഥാനത്ത് നടക്കുമെന്ന് അസോസിയേഷന്‍ ജനറല്‍ സെക്രട്ടറി ഡോ. ഷര്‍മദ് ഖാന്‍ വാര്‍ത്താസമ്മേളനത്തില്‍ അറിയിച്ചു.
തമ്പാനൂര്‍, ഹോട്ടല്‍ അപ്പോളോ ഡിമോറയില്‍ ഇന്ന് ഉച്ചക്ക് 1.30ന് മന്ത്രി സി. രവീന്ദ്രനാഥ് ഉദ്ഘാടനം ചെയ്യുന്ന മാധ്യമ സെമിനാറോടുകൂടി സമ്മേളനം ആരംഭിക്കും. ബി. സത്യന്‍ എം.എല്‍.എ മുഖ്യപ്രഭാഷണം നടത്തും. വൈകുന്നേരം നടക്കുന്ന സംസ്ഥാന കൗണ്‍സിലിന്റെ ഉദ്ഘാടനം രക്ഷാധികാരി ഡോ. തൊടിയൂര്‍ ശശികുമാര്‍ നിര്‍വഹിക്കും.
നാളെ രാവിലെ 10ന് 60ാം വാര്‍ഷികാഘോഷ സമാപനം ഭരണപരിഷ്‌കാര കമ്മിഷന്‍ ചെയര്‍മാന്‍ വി.എസ്. അച്യുതാനന്ദന്‍ ഉദഘാടനം ചെയ്യും.
തുടര്‍ന്ന് പ്രതിനിധി സമ്മേളനം മന്ത്രി കടകംപള്ളി സുരേന്ദ്രനും ഉച്ചക്ക് രണ്ടിന് നടക്കുന്ന 'സംഘടനയുടെ നാള്‍വഴികള്‍' സെമിനാര്‍ മന്ത്രി കടന്നപ്പള്ളി രാമചന്ദ്രനും ഉദ്ഘാടനം ചെയ്യും.