തൃശൂര്‍: എ.വി.എസ് പണിക്കരുടെ ജന്മശതാബ്ദി ആഘോഷങ്ങളുടെ സമാപനം 'സ്മരണീയം' 29ന് തൃശൂര്‍ സാഹിത്യ അക്കാദമി ഹാളില്‍ നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറയിച്ചു. വൈകിട്ട് 4ന് നടക്കുന്ന ചടങ്ങില്‍ ആയുര്‍വേദം, ജ്യോതിഷം, സാഹിത്യം, സംസ്‌കൃതം, സംഗീതം എന്നീ മേഖലകളിലെ പ്രഗദ്ഭരായ ഡോ. പി.കെ വാരിയര്‍, കപാലി നമ്പൂതിരി, പ്രൊഫ. എം.കെ സാനു, കെ.പി അച്ചുത പിഷാരോടി, വിദ്യാധരന്‍ എന്നിവര്‍ക്ക് എ.വി.എസ് സ്മാരക പഞ്ചരത്‌ന പുരസ്‌കാരങ്ങള്‍ നല്‍കി ആദരിക്കും. എ.വി.എസ് സ്മാരക മന്ദിരത്തിന്റെ ശിലാസ്ഥാപനം  അടൂര്‍ ഗോപാലകൃഷ്ണന്‍ നിര്‍വഹിക്കും. സമാപന സമ്മേളനം കൃഷിമന്ത്രി വി.എസ് സുനില്‍കുമാര്‍ ഉദ്ഘാടനം ചെയ്യും. സ്മരണിക പ്രകാശനം ചേന്നാസ് ദിനേശന്‍ നമ്പൂതിരിപ്പാടും വെബ്‌സൈറ്റ് ഉദ്ഘാടനം കലാമണ്ഡലം ഗോപിയും ദൈവജ്ഞമിത്രം പുസ്തക പ്രകാശനം പെരുവനം കുട്ടന്‍മാരാരും നിര്‍വഹിക്കും. രാവിലെ 9 മുതല്‍ 3 വരെ കപാലി നമ്പൂതിരിയുടെ ജ്യോതിഷശാസ്ത്ര നിഗൂഢാര്‍ഥ വിചാരം വിഷയാവതരണം ഉണ്ടാകും. വാര്‍ത്താ സമ്മേളനത്തില്‍ അഡ്വ. എ.യു രഘുരാമന്‍ പണിക്കര്‍, കെ.എ നാരായണന്‍ ആമ്പല്ലൂര്‍, കോലഴി സുരേന്ദ്ര പണിക്കര്‍, ഉണ്ണിരാജന്‍ കുറുപ്പ് എന്നിവര്‍ പങ്കെടുത്തു.