ന്യൂഡല്‍ഹി: അനധികൃത സ്വത്ത് സമ്പാദന വിഷയത്തിലുള്ള കേസില്‍ സമാജ് വാദി പാര്‍ട്ടി നേതാവ് മുലായം സിങ് യാദവ് സുപ്രിംകോടതിയില്‍ സത്യവാങ്മൂലം സമര്‍പ്പിച്ചു. മുലായംസിങ് ഉത്തര്‍പ്രദേശ് മുഖ്യമന്ത്രിയായിരുന്ന സമയത്ത് അദ്ദേഹത്തിന്റെയും മക്കളുടെയും പേരില്‍ അനധികൃതമായി സ്വത്ത് സമ്പാദിച്ചെന്ന് ചൂണ്ടിക്കാട്ടി സാമൂഹ്യപ്രവര്‍ത്തകനായ വിശ്വനാഥ് ചതുര്‍വേദി നല്‍കിയ ഹരജിയിലാണ് സത്യവാങ്മൂലം സമര്‍പ്പിച്ചത്.
1999 മുതല്‍ 2005 വരെ മുലായം സിങ് യാദവ് മുഖ്യമന്ത്രിയായ സമയത്ത് നൂറു കോടിയോളം രൂപയുടെ അനധികൃത സ്വത്ത് സമ്പാദനം നടത്തിയെന്നായിരുന്നു ഹരജിയില്‍ ചൂണ്ടിക്കാട്ടിയിരുന്നത്. എന്നാല്‍, കേസില്‍ സി.ബി.ഐ നടത്തിയ പ്രാഥമികാന്വേഷണത്തില്‍തന്നെ തനിക്കു ക്ലീന്‍ചിറ്റ് നല്‍കിയതാണെന്നാണ് മുലായം സത്യവാങ്മൂലത്തില്‍ വിശദീകരിക്കുന്നത്.

2005ലാണ് മുലായം അനധികൃതമായി സ്വത്ത് സമ്പാദിച്ചെന്നു ചൂണ്ടിക്കാട്ടി വിശ്വനാഥ് ചതുര്‍വേദി ഹരജി നല്‍കിയിരുന്നത്. കേസില്‍ 2007 മാര്‍ച്ചില്‍ സുപ്രിംകോടതി സി.ബി.ഐ അന്വേഷണത്തിന് ഉത്തരവിട്ടു.

എന്നാല്‍, ആ ഹരജിയില്‍ അന്വേഷണം നടത്തുന്നതിലും റിപ്പോര്‍ട്ട് സമര്‍പ്പിക്കുന്നതിലും അന്വേഷണ ഏജന്‍സി പരാജയപ്പെട്ടെന്നു ചൂണ്ടിക്കാട്ടി അദ്ദേഹം വീണ്ടും കോടതിയെ സമീപിക്കുകയായിരുന്നു. അന്വേഷണ റിപ്പോര്‍ട്ട് സുപ്രിംകോടതിക്കു മുന്‍പാകെയോ മജിസ്‌ട്രേറ്റ് കോടതിക്കു മുന്‍പാകെയോ സമര്‍പ്പിക്കണമെന്നായിരുന്നു അദ്ദേഹത്തിന്റെ ആവശ്യം. കേസില്‍ എഫ്.ഐ.ആര്‍ രജിസ്റ്റര്‍ ചെയ്യാത്തതും ഹരജിയില്‍ ചൂണ്ടിക്കാട്ടിയിരുന്നു. മാര്‍ച്ച് 25നു നടന്ന വാദംകേള്‍ക്കലില്‍ വിഷയത്തില്‍ രണ്ടാഴ്ചയ്ക്കകം റിപ്പോര്‍ട്ട് സമര്‍പ്പിക്കാന്‍ സുപ്രിംകോടതി സി.ബി.ഐയോട് ആവശ്യപ്പെട്ടിരുന്നു.
തെരഞ്ഞെടുപ്പ് അടുത്തപ്പോള്‍ കുത്തിപ്പൊങ്ങിയ കേസാണിതെന്നു വാദത്തിനിടെ മുലായം സിങ്ങിന്റെ അഭിഭാഷകന്‍ പറഞ്ഞെങ്കിലും, സമയം പ്രധാനമല്ലെന്നായിരുന്നു സുപ്രിംകോടതിയുടെ മറുപടി. ചീഫ് ജസ്റ്റിസ് രഞ്ജന്‍ ഗൊഗോയ് ഉള്‍പ്പെടുന്ന ബെഞ്ച് കേസ് ഇന്നു വീണ്ടും പരിഗണിക്കും.