ഖാര്‍ത്തൂം: സുദാനില്‍ 30 വര്‍ഷമായി അധികാരത്തിലുള്ള പ്രസിഡന്റ് ഉമര്‍ അല്‍ ബഷീറിനെ സൈന്യം പുറത്താക്കി. പ്രസിഡന്റിനെതിരേ മാസങ്ങളായി രാജ്യത്തു നടക്കുന്ന പ്രക്ഷോഭത്തെ തുടര്‍ന്നാണ് സൈനിക ഇടപെടല്‍.

പ്രതിരോധ മന്ത്രി അവദ് ഇബ്‌നു ഔഫാണ് പ്രസിഡന്റിനെ പുറത്താക്കിയ വിവരം ദേശീയ ടെലിവിഷനിലൂടെ അറിയിച്ചത്. പ്രസിഡന്റിനെ അറസ്റ്റ് ചെയ്തു. അടുത്ത രണ്ടു വര്‍ഷത്തെ ഭരണം സൈന്യം ഏറ്റെടുത്തു. അടുത്ത മൂന്നു മാസം രാജ്യത്ത് അടിയന്തരാവസ്ഥയായിരിക്കുമെന്നും പ്രഖ്യാപിച്ചു. സൈന്യം ഭരണഘടന റദ്ദാക്കി. രാജ്യത്തിന്റെ അതിര്‍ത്തികള്‍ അടിച്ചിടും.

മോശം ഭരണത്താല്‍ ജനങ്ങള്‍ ദുരിതം അനുഭവിക്കുകയാണെന്നു പ്രതിരോധ മന്ത്രി പറഞ്ഞു. നീതിയില്ല, അഴിമതി കൊടുകുത്തിവാഴുന്നു. രാജ്യത്തിന്റെ വിവിധ ഭാഗങ്ങളിലുണ്ടായ പ്രതിഷേധത്തില്‍ ജനങ്ങള്‍ കൊല്ലപ്പെട്ടതില്‍ മാപ്പു ചോദിക്കുകയാണെന്നും അദ്ദേഹം പറഞ്ഞു. എന്നാല്‍, രാജ്യത്തു സൈനിക ഭരണം ഏര്‍പ്പെടുത്തിയതിനെതിരേ എതിര്‍പ്പുമായി ജനകീയ പ്രക്ഷോഭത്തിനു നേതൃത്വം നല്‍കിയ സംഘടനയായ അലയന്‍സ് ഫോര്‍ ഫ്രീഡം ആന്‍ഡ് ചേഞ്ച് രംഗത്തെത്തി. സൈനിക അട്ടിമറിയിലൂടെ സമാനമായി ഭരണകൂടമാണ് പുനഃസ്ഥാപിച്ചിരിക്കുന്നത്. നിലവിലുള്ള സമ്പ്രദായം തന്നെയാണ് രാജ്യത്തു തുടരുകയെന്നും ജനങ്ങള്‍ പ്രതിഷേധം തുടരണമെന്നും അവര്‍ ആവശ്യപ്പെട്ടു. സൈനിക ഭരണത്തെയും അവര്‍ പുറത്തിറക്കിയ പ്രസ്താവനയെയും സംഘടന തള്ളി. സൈനിക ആസ്ഥാനത്തുള്ള പ്രതിഷേധം തുടരണമെന്നും രാജ്യത്തുടനീളം വ്യാപിപ്പിക്കണമെന്നും അവര്‍ ആവശ്യപ്പെട്ടു.

എന്നാല്‍, സൈനിക ഭരണ പ്രഖ്യാപനം ഒരു വിഭാഗം ജനങ്ങള്‍ ആഹ്ലാദത്തോടെയാണ് സ്വീകരിച്ചത്. തലസ്ഥാനമായ ഖാര്‍ത്തൂമിലെ സൈനിക ആസ്ഥാനത്തിനു മുന്നില്‍ ജനങ്ങള്‍ ആഹ്ലാദ പ്രകടനങ്ങള്‍ നടത്തി. അതിനിടെ, രാജ്യത്തെ മുഴുവന്‍ രാഷ്ട്രീയ തടവുകാരെയും വിട്ടയക്കുകയാണെന്നു സുദാന്‍ രഹസ്യാന്വേഷണ വിഭാഗം അറിയിച്ചിട്ടുമുണ്ട്.
ഉമര്‍ അല്‍ ബഷീറിനെതിരേ നേരത്തെ അന്തരാഷ്ട്ര കോടതി യുദ്ധക്കുറ്റം ചുമത്തി അറസ്റ്റ് വാറന്‍ഡ് പുറപ്പെടുവിച്ചിരുന്നു. 1989ല്‍ അട്ടിമറിയിലൂടെയാണ് ഉമര്‍ അല്‍ ബഷീര്‍ സുദാന്‍ പ്രസിഡന്റാകുന്നത്. ആഫ്രിക്കയിലെ രാജ്യങ്ങളില്‍ ഏറ്റവും കൂടുതല്‍ കാലം പ്രസിഡന്റായ വ്യക്തിയാണ് ഇദ്ദേഹം. ഭക്ഷ്യ വസ്തുക്കളുടെ വില വര്‍ധിച്ചതിനെ തുടര്‍ന്നു ഡിസംബര്‍ മുതലാണ് പ്രസിഡന്റിന്റെ രാജി ആവശ്യപ്പെട്ടു രാജ്യത്തു പ്രതിഷേധം ആരംഭിച്ചത്. ശനിയാഴ്ച മുതല്‍ ഖാര്‍ത്തൂമിലെ സൈനിക ആസ്ഥാനത്തു തുടങ്ങിയ പ്രതിഷേധത്തില്‍ പതിനായിരങ്ങള്‍ പങ്കെടുത്തിരുന്നു.