ഈരാററുപേട്ട: വേനല്‍ മഴ മാറി നിന്നതോടെ കുടിവെള്ള പദ്ധതികള്‍ ഫലം കണ്ടില്ല,  ഈരാറ്റുപേട്ടയിലെ കിഴക്കന്‍ മേഖല  കുടിവെള്ളത്തിനായി നെട്ടോട്ടത്തില്‍. തലനാട്, തീക്കോയി, പൂഞ്ഞാര്‍ പഞ്ചായത്തുകള്‍ കടുത്ത വരള്‍ച്ചയുടെ പിടിയിലാണ്.
ഈരാറ്റുപേട്ടയില്‍ ഭൂഗര്‍ഭ ജലനിരപ്പ് ക്രമാതീതമായി താഴുന്നതിനാല്‍ നാട്ടിന്‍പുറങ്ങളിലെ ജലസുലഭമായ കണിറുകള്‍പോലും വറ്റിതുടങ്ങി.  ഒരിക്കല്‍പോലും വെള്ളം വറ്റിയിട്ടില്ലാത്ത കിണറുകള്‍വരെ ഈ വേനല്‍കാലത്ത് വരണ്ടു.  
ചില കിണറുകള്‍ വറ്റിവരണ്ടപ്പോള്‍ മറ്റുചിലതില്‍ വെള്ളം പേരിനുമാത്രമാണുള്ളതെന്ന് നാട്ടുകാര്‍ പറയുന്നു.  നിരവധി കുടുംബങ്ങള്‍ ആശ്രയിച്ചിരുന്ന കിണറുകളില്‍ ജലക്ഷാമം ഉണ്ടായത് ഗ്രാമപ്രദേശങ്ങളില്‍ വലിയ പ്രതിസന്ധിയാണ് സൃഷ്ടിച്ചിരിക്കുന്നത്.  ഭൂഗര്‍ഭ ജലനിരക്ക് നാല് അടിയോളം താഴ്ന്നതായിട്ടാണ് പഠനറിപ്പോര്‍ട്ടുകള്‍.
 മുന്‍കാലങ്ങളില്‍ നിര്‍മിച്ച കുഴല്‍കിണറുകളിലും ജലലഭ്യത കുറഞ്ഞിട്ടുണ്ട്.  ഇപ്പോള്‍ കുഴിക്കുന്ന കുഴല്‍ കിണറുകളില്‍ മുന്‍കാലങ്ങളെ അപേക്ഷിച്ച് ആഴത്തില്‍ കുഴിച്ചാല്‍ മാത്രമേ വെള്ളം ലഭിക്കുകയുള്ളു.  
മുന്‍പ് 100 അടിക്ക് വെള്ളം ലഭിച്ചിരുന്നെങ്കില്‍ ഇപ്പോള്‍ അത് 150 അടി കുഴിക്കേണ്ടി വരുന്ന സ്ഥിതിയാണ്.   കുഴല്‍ കിണറുകളിലെ ജല ലഭ്യത കുറഞ്ഞത് ഗ്രാമീണ മേഖലയിലെ കുടിവെള്ള പദ്ധതികളേയും പ്രതികൂലമായി ബാധിച്ചു.  
കുഴല്‍ കിണറുകളെയും മീനച്ചിലാറിനെയും ആശ്രയിച്ചാണ് ഈരാറ്റുപേട്ട മുനിസിപ്പാലിറ്റിയിലെ ചെറുകിട കുടിവെള്ള പദ്ധതികള്‍ പ്രവര്‍ത്തിക്കുന്നത്.  എന്നാല്‍, മീനച്ചിലാററിലെ വെള്ളം കുറഞ്ഞതോടെ മിക്കയിടത്തും ജലവിതരണം തടസ്സപ്പെട്ടു. അതിനാല്‍ തന്നെ ഈരാറ്റുപേട്ട മേഖലയിലെ കുടിവെള്ളക്ഷാമം പരിഹരിക്കുന്നതിന് മീനച്ചില്‍ റിവര്‍വാലി പദ്ധതി നടപ്പിലാക്കണമെന്ന ആവശ്യമാണ്  നാട്ടുകാര്‍ ഉന്നയിക്കുന്നത്.