പാലാ: ശബരിമല വിമാനത്താവളത്തിനായി ചെറുവള്ളി എസ്‌റ്റേറ്റ് സര്‍ക്കാര്‍ ഏറ്റെടുക്കുന്നതിനെതിരായ കേസില്‍ കക്ഷി ചേരാന്‍ വിവിധ സംഘടനകള്‍ ഇന്നലെ കോടതിയില്‍ അപേക്ഷ സമര്‍പ്പിച്ചു.
വിശ്വഹിന്ദു പരിഷത്ത് ജില്ലാ കമ്മിറ്റി, പശ്ചിമഘട്ട സംരക്ഷണ സമിതി, സി.പി.ഐ (എം.എല്‍) നേതാവ് എം.കെ ദാസന്‍, അഖില കേരള ഭൂരഹിത കര്‍ഷക തൊഴിലാളി സംഘം, ഭൂസമര മുന്നണി, ബിലീവേഴ്‌സ് ഈസ്‌റ്റേണ്‍ ചര്‍ച്ച് സേവ് ഫോറം എന്നിവയാണ് പാലാ സബ് കോടതിയില്‍ അപേക്ഷ സമര്‍പ്പിച്ചത്.
ശബരിമല വിമാനത്താവളത്തിനായി ചെറുവള്ളി എസ്‌റ്റേറ്റ് സര്‍ക്കാര്‍ ഏറ്റെടുക്കുന്നതിനെതിരായ സിവില്‍ കേസ് പരിഗണിക്കുമ്പോഴാണ് കക്ഷി ചേരാന്‍ കൂടുതല്‍ സംഘടനകള്‍ രംഗത്തെത്തിയത്. ഇതു സംബന്ധിച്ച വാദം കേള്‍ക്കാന്‍ കേസ് ഓഗസ്റ്റ് 19 ലേക്ക് മാറ്റി. സര്‍ക്കാരിനു വേണ്ടി പബ്ലിക് പ്രോസിക്യൂട്ടര്‍ ഐക്ക് മാണി ഹാജരായി. ചെറുവള്ളി എസ്‌റ്റേറ്റിന്റെ സ്ഥലം ചെറുവള്ളി ദേവസ്വം വകയാണന്ന് വിശ്വഹിന്ദു പരിഷത്ത് ഹരജിയില്‍ പറയുന്നു. സഭയുടെ ഉടമസ്ഥതയിലുള്ള ചെറുവള്ളി എസ്‌റ്റേറ്റ് ഏറ്റെടുക്കുന്നതില്‍ സഭാ വിശ്വാസികളുടെ ഭാഗം കൂടി കേള്‍ക്കണമെന്ന് ആവശ്യപെട്ടുകൊണ്ടാണ് ബിലീവേഴ്‌സ് ഈസ്റ്റേണ്‍ ചര്‍ച്ച് സേവ് ഫോറം ഹരജി നല്‍കിയിട്ടുള്ളത്.