തിരുവനന്തപുരം: ആറു വ്യവസായ പാര്‍ക്കുകളെ ബന്ധിപ്പിച്ച് ഏകജാലക ക്ലിയറന്‍സ് ബോര്‍ഡ് രൂപീകരിക്കാന്‍ മന്ത്രിസഭായോഗം തീരുമാനിച്ചു. പാലക്കാട്ടെ കിന്‍ഫ്രയുടെ മെഗാ ഫുഡ് പാര്‍ക്ക്, കോഴിക്കോട്ടെ രാമനാട്ടുകര വ്യവസായ പാര്‍ക്ക്, കുറ്റിപ്പുറം വ്യവസായ പാര്‍ക്ക്, തൃശൂരിലെ പുഴക്കല്‍പ്പാടം വ്യവസായ പാര്‍ക്ക്, കെ.എസ്.ഐ.ഡി.സിയുടെ അങ്കമാലി ബിസിനസ് പാര്‍ക്ക്, പാലക്കാട് ലൈറ്റ് എന്‍ജിനീയറിങ് പാര്‍ക്ക് എന്നിവയ്‌ക്കെല്ലാം ബാധകമായ ഏകജാലക ക്ലിയറന്‍സ് ബോര്‍ഡ് രൂപീകരിക്കാനാണ് തീരുമാനം.
വ്യവസായ സംരംഭങ്ങള്‍ ആരംഭിക്കുന്നതിന് ആവശ്യമായ വിവിധ ലൈസന്‍സുകളും ക്ലിയറന്‍സുകളും വേഗത്തില്‍ ലഭ്യമാക്കുന്നതിനാണ് ബോര്‍ഡ് രൂപീകരിക്കുന്നത്. വ്യവസായ വകുപ്പ് അഡീഷനല്‍ ചീഫ് സെക്രട്ടറിയായിരിക്കും ചെയര്‍മാന്‍. കിന്‍ഫ്ര, കെ.എസ്.ഐ.ഡി.സി എന്നിവയുടെ പ്രതിനിധികളും ജില്ലാ കലക്ടറും മലിനീകരണ നിയന്ത്രണ ബോര്‍ഡ് ഉദ്യോഗസ്ഥനും ഉള്‍പ്പെടെ 15 അംഗങ്ങളുള്ളതായിരിക്കും ബോര്‍ഡ്. കിന്‍ഫ്ര മുഖേന പെട്രോ കെമിക്കല്‍ കോംപ്ലക്‌സ് സ്ഥാപിക്കുന്നതിന് ഫാക്ടിന്റെ കൈവശമുള്ള ഭൂമിയില്‍നിന്ന് 600 ഏക്കര്‍ പരസ്പര ധാരണ പ്രകാരം ഏറ്റെടുക്കാനും തീരുമാനിച്ചു. 1,864 കോടി രൂപ ചെലവില്‍ കിന്‍ഫ്ര സ്ഥാപിക്കുന്ന പെട്രോ കെമിക്കല്‍ കോംപ്ലക്‌സിനു വേണ്ടിയാണ് ഭൂമി ഏറ്റെടുക്കുന്നത്.