സിംഗപ്പൂര്‍ സിറ്റി: സിംഗപ്പൂര്‍ ഓപ്പണ്‍ ബാഡ്മിന്റണ്‍ ചാംപ്യന്‍ഷിപ്പിലെ വനിതാ വിഭാഗം സിംഗിള്‍സില്‍ ഇന്ത്യന്‍ താരങ്ങളായ പി.വി സിന്ധു സെമിയിലെത്തിയപ്പോള്‍ സൈന നെഹ്‌വാള്‍ പുറത്തായി. ചൈനീസ് താരം സായ് യന്യനെ 21-13, 17-21, 21-14 എന്ന സ്‌കോറിനാണ് സിന്ധു തോല്‍പ്പിച്ചത്. ജാപ്പനീസ് താരം നൊസോമി ഒകുഹാരയോടാണ് സൈന പരാജയപ്പെട്ടത്. 21-8, 21-13 എന്ന സ്‌കോറിനായിരുന്നു സൈനയുടെ തോല്‍വി.
ചൈനീസ് താരത്തിന്റെ കടുത്തവെല്ലുവിളി അതിജീവിച്ചാണ് സിന്ധുവിന്റെ സെമി പ്രവേശം. ആദ്യ സെറ്റില്‍ അനായാസ വിജയമാണ് ഇന്ത്യന്‍ താരം സ്വന്തമാക്കിയത്. എന്നാല്‍, രണ്ട@ാം സെറ്റില്‍ ചൈനീസ് താരത്തിന്റെ മികവിനേക്കാള്‍ അനാവശ്യ പിഴവുകള്‍ സിന്ധുവിന് വിനയായി. നിര്‍ണായകമായ മൂന്നാം സെറ്റില്‍ 11-5 എന്ന നിലയില്‍ ലീഡെടുത്ത സിന്ധു 21-14 എന്ന നിലയില്‍ മത്സരം സ്വന്തമാക്കുകയായിരുന്നു. സൈന നേരിട്ടുള്ള സെറ്റുകള്‍ക്കായിരുന്നു നൊസോമി ഒകുഹാരയോട് പരാജയപ്പെട്ടത്. ലോക ഒന്നാം നമ്പര്‍ താരമായ ജപ്പാന്റെ കെന്റോ മോമോട്ടയോട് പരാജയപ്പെട്ട് പുരുഷ സിംഗിള്‍സില്‍നിന്ന് ശ്രീകാന്തും പുറത്തായി. മൂന്ന് ഗെയിം പോരാട്ടത്തിലാണ് ശ്രീകാന്തിന്റെ പരാജയം.
മത്സരത്തില്‍ ആദ്യ ഗെയിം കൈവിട്ട ശേഷം ശ്രീകാന്ത് മികച്ച തിരിച്ചുവരവ് നടത്തിയെങ്കിലും മൂന്നാം സെറ്റ് നഷ്ടമാവുകയായിരുന്നു. 18-21, 21-19, 9-21 എന്ന സ്‌കോറിനായിരുന്നു ശ്രീകാന്തിന്റെ തോല്‍വി.