ദുബൈ: ഇനിമുതൽ ക്രിപ്‌റ്റോകറൻസി ഉപയോഗിച്ചും എമിറേറ്റ്‌സ് വിമാന ടിക്കറ്റുകൾ ബുക്ക് ചെയ്യാം. ദുബൈയിലെ പ്രമുഖ വിമാനക്കമ്പനിയായ എമിറേറ്റ്‌സ് ഇതിനായി 'ക്രിപ്‌റ്റോ.കോം പേ' (Crypto.com Pay) സംവിധാനവുമായി ഔദ്യോഗികമായി സഹകരിച്ചു തുടങ്ങി. യുഎഇ ദിർഹമിൽ നിരക്ക് ഈടാക്കുന്ന വിമാന ടിക്കറ്റുകൾക്കാണ് നിലവിൽ ഈ ഡിജിറ്റൽ പേയ്‌മെന്റ് സൗകര്യം ലഭ്യമാകുക.

എമിറേറ്റ്‌സിന്റെ വെബ്‌സൈറ്റ് വഴിയോ മൊബൈൽ ആപ്പ് വഴിയോ ബുക്ക് ചെയ്യുന്ന ക്രിപ്‌റ്റോ.കോം അക്കൗണ്ടുള്ള ഉപഭോക്താക്കൾക്ക് ഈ സേവനം ഉപയോഗപ്പെടുത്താം. 2026 അവസാനത്തോടെ സ്വകാര്യ-സർക്കാർ മേഖലകളിലെ 90 ശതമാനം സാമ്പത്തിക ഇടപാടുകളും ഡിജിറ്റലാക്കുക എന്ന ദുബൈ കാഷ്‌ലെസ് ഡിജിറ്റൽ അജണ്ടയുടെ (D33) ഭാഗമായാണ് ഈ നടപടി.

ഉപഭോക്താക്കൾക്ക് എങ്ങനെ പണമടയ്ക്കാം?

എമിറേറ്റ്സ് ആപ്പ് വഴിയോ വെബ്‌സൈറ്റ് വഴിയോ ബുക്ക് ചെയ്യുന്നവർക്ക് എളുപ്പത്തിൽ ക്രിപ്റ്റോകറൻസി ഉപയോഗിച്ച് പണമടയ്ക്കാനാകും:

എമിറേറ്റ്സ് ആപ്പ് വഴി ബുക്ക് ചെയ്യുമ്പോൾ:

ടിക്കറ്റ് ബുക്കിംഗിലെ ചെക്ക്ഔട്ട് പേജിൽ 'Crypto.com Pay' തിരഞ്ഞെടുക്കുക.

സിസ്റ്റം ഉപഭോക്താവിനെ Crypto.com ആപ്പിലേക്ക് റീഡയറക്‌ട് ചെയ്യുകയും, വാലറ്റിൽ നിന്നുള്ള പണമടയ്ക്കൽ അംഗീകരിക്കാൻ ആവശ്യപ്പെടുകയും ചെയ്യും.

പേയ്‌മെന്റ് പൂർത്തിയാകുന്നതോടെ എമിറേറ്റ്സ് ആപ്പിൽ ബുക്കിംഗ് സ്ഥിരീകരണവും ഇ-ടിക്കറ്റും ലഭ്യമാകും.

emirates.com വെബ്‌സൈറ്റ് വഴി ബുക്ക് ചെയ്യുമ്പോൾ:

ചെക്ക്ഔട്ട് ചെയ്യുമ്പോൾ 'Crypto.com Pay' ഓപ്ഷൻ തിരഞ്ഞെടുക്കുക.

സ്‌ക്രീനിൽ തെളിയുന്ന QR കോഡ് Crypto.com ആപ്പ് ഉപയോഗിച്ച് സ്കാൻ ചെയ്യുക.

ആപ്പിൽ പേയ്‌മെന്റ് അംഗീകരിക്കുന്നതോടെ ബുക്കിംഗ് സ്ഥിരീകരണവും ഇ-ടിക്കറ്റും സ്ക്രീനിൽ തെളിയും.

സുരക്ഷിതവും നിയമവിധേയവും

യുഎഇയിലെ ധനകാര്യ സുരക്ഷാ മാനദണ്ഡങ്ങൾ പാലിച്ചാണ് മുഴുവൻ ഇടപാടുകളും നടക്കുന്നത്. യുവതലമുറയ്ക്കും ഡിജിറ്റൽ സാമ്പത്തിക ഇടപാടുകൾ ഇഷ്ടപ്പെടുന്നവർക്കും യാത്രാ ചെലവുകൾ എളുപ്പത്തിൽ കൈകാര്യം ചെയ്യാൻ ഈ തീരുമാനം സഹായിക്കുമെന്ന് എമിറേറ്റ്‌സ് ഡെപ്യൂട്ടി പ്രസിഡന്റും സിഒഒയുമായ അദ്‌നാൻ കാസിം പറഞ്ഞു.

ALSO READ: UAE travel update: യുഎഇയില്‍ വിമാന സര്‍വീസുകള്‍ സാധാരണ നിലയിലേക്ക്; ഗള്‍ഫ് റൂട്ടുകളില്‍ ചില സര്‍വീസുകള്‍ റദ്ദാക്കി

Emirates will soon allow customers to book flight tickets using cryptocurrency, offering travellers and expatriates a secure, flexible payment option as digital assets gain wider acceptance in aviation.