ന്യൂഡല്‍ഹി: ഒറ്റദിവസം നാലുലക്ഷത്തിലധികം കൊവിഡ് പരിശോധനകള്‍ നടത്തിയ നേട്ടത്തില്‍ ഇന്ത്യ. കഴിഞ്ഞ 24 മണിക്കൂറിനുള്ളില്‍ 4,20,898 സാംപിളുകളാണ് രാജ്യത്ത് പരിശോധിച്ചത്. ഇതാദ്യമായാണ് രാജ്യത്തെ കൊവിഡ് പരിശോധനകളുടെ എണ്ണം ഇത്രയും വര്‍ധിക്കുന്നത്. 

കഴിഞ്ഞ ഒരാഴ്ചയായി 3,50,000 പരിശോധനകള്‍ ഓരോ ദിവസവും നടത്തുന്നുണ്ടെന്ന് കേന്ദ്ര ആരോഗ്യ മന്ത്രാലയം അറിയിച്ചു. രാജ്യത്ത് ആകെ 1,58,49,068 സാംപിളുകളാണ് പരിശോധിച്ചത്. പരിശോധന ദിനംപ്രതി വര്‍ധിക്കുകയാണ്. 

രാജ്യത്ത് കൊവിഡ് പരിശോധനക്ക് 1301 ലാബുകളാണുള്ളത്. ഇതില്‍ 902 എണ്ണം സര്‍ക്കാര്‍ ലാബുകളും 399  സ്വകാര്യലാബുകളുമാണ്. കൊവിഡ് മരണനിരക്ക് 2.35 ശതമാനമായി കുറഞ്ഞതായും ആരോഗ്യമന്ത്രാലയം അറിയിച്ചു. 

24 മണിക്കൂറിനിടെ 32,223 പേര്‍ രോഗമുക്തി നേടി. സുഖം പ്രാപിച്ചവരുടെ ആകെ എണ്ണം 8,49,431 ആയി. രോഗമുക്തിനിരക്ക് വീണ്ടും ഉയര്‍ന്ന് 63.54 ശതമാനമായി. 

രോഗമുക്തരും ചികിത്സയില്‍ കഴിയുന്നവരും തമ്മിലുള്ള അന്തരം 3,93,360 ആയി വര്‍ധിച്ചുവെന്നും ആരോഗ്യമന്ത്രാലയം അറിയിച്ചു.