ആലുവ: ദിനംപ്രതി നിരവധി മദ്യ-മയക്കുമരുന്ന് കേസുകള്‍ പിടികൂടുന്ന ആലുവ എക്‌സൈസ് ഓഫിസിലെ മൊബൈല്‍ ലബോറട്ടറി പ്രവര്‍ത്തനരഹിതം.
കെമിക്കല്‍ എക്‌സാമിനര്‍മാരുടെ നിയമനം വൈകുന്നതാണ് ലബോറട്ടറിയുടെ പ്രവര്‍ത്തനം അനിശ്ചിതത്വത്തിലാകാന്‍ കാരണം. ഏറെനാളത്തെ പരാതികള്‍ക്കും, ആവശ്യങ്ങള്‍ക്കുമൊടുവില്‍ ലഭ്യമായ ലബോറട്ടറിയാണ് സര്‍ക്കാരിന്റെ അനാസ്ഥമൂലം ആറ് മാസത്തിലേറെയായിട്ടും പ്രവര്‍ത്തിപ്പിക്കാനാകാത്തത്.
എക്‌സൈസ് വകുപ്പ് പിടികൂടുന്ന കേസുകളിലെ മദ്യത്തിന്റെ പരിശോധന പൂര്‍ത്തിയാക്കി, കേസ് നടപടിക്രമങ്ങള്‍ വേഗത്തിലാക്കന്നതിനായിട്ടാണ് ഏറെ നാളായി എക്‌സൈസ് മൊബൈല്‍ ലബോറട്ടറി സംവിധാനം ആവശ്യപ്പെട്ടിരുന്നത്. ലാബ് പ്രവര്‍ത്തനം വൈകുന്നതുമൂലം എക്‌സൈസ് പിടികൂടുന്ന തൊണ്ടിസാധനങ്ങള്‍ സൂക്ഷിക്കാനാകാതെ എക്‌സൈസ് ഉദ്യോഗസ്ഥരും കുഴയുകയാണ്.
ഇന്നലെ എക്‌സൈസ് കമ്മിഷണര്‍ ഋഷിരാജ്‌സിങിന്റെ സന്ദര്‍ശനത്തില്‍ മൊബൈല്‍ ലബോറട്ടറിയുടെ ദുരവസ്ഥ ഉദ്യോഗസ്ഥര്‍ ചൂണ്ടിക്കാട്ടി.
പ്രശ്‌ന പരിഹാരത്തിന് നടപടി കൈക്കൊള്ളാമെന്ന് ഇദ്ദേഹം ഉറപ്പുനല്‍കിയതായി ഉദ്യോഗസ്ഥര്‍ പറഞ്ഞു.