മലപ്പുറം: സോഷ്യല്‍ മീഡിയ ഏറ്റെടുത്ത ഫാഇസിന്റെ വൈറല്‍ ഡയലോഗ് ചെലോല്‍ത് റെഡ്യാവും , ചെലോല്‍ത് റെഡ്യാവൂല' പരസ്യവാചകമാക്കി മില്‍മ. മലബാര്‍ മില്‍മയുടെ ഒഫീഷ്യല്‍ പേജിലാണ് പരസ്യം പങ്കുവെച്ചിട്ടുള്ളത്. 'ചെലോല്‍ത് ശരിയാവും , ചെലോല്‍ത് ശരിയാവൂല പക്ഷേങ്കി ചായ എല്ലാര്‍തും ശരിയാവും പാല്‍ മില്‍മ ആണെങ്കില്‍'- ഇതാണ് പരസ്യവാചകം.

കഴിഞ്ഞ കുറച്ചു ദിവസങ്ങളായി സോഷ്യല്‍ മീഡിയകളില്‍ നിറഞ്ഞു നില്‍ക്കുകയാണ് മലപ്പുറം ജില്ലയിലെ കിഴിശ്ശേരി കുഴിഞ്ഞൊളം പറക്കാട് കുന്ന ത്തീരി അബ്ദുല്‍ മുനീര്‍ സഖാഫി- മൈമുന ദമ്പതികളുടെ മകന്‍ മുഹമ്മദ് ഫാഇസിന്റെ പൂ നിര്‍മാണ വീഡിയോ. വീട്ടിലെ ഫോണെടുത്ത് റൂമില്‍ കയറി ഈ നാലാമ ക്ലാസുകാരന്‍ ചെയ്തു വിട്ട വീഡിയോ ഗള്‍ഫിലുള്ള ഉപ്പക്കാണ് ആദ്യം അയച്ചു കോടുത്തത്. കുടുംബാംഗങ്ങള്‍ ആസ്വദിച്ച വീഡിയോ കുടുംബ ഗ്രൂപ്പുകളിലേക്കു അവിടുന്ന് നാട്ടിലെ ഗ്രൂപ്പുകളിലേക്കും അങ്ങിനെ ലോകമൊട്ടുക്കും പറക്കുകയായിരുന്നു. എന്തൊരു പോസിറ്റിവ്‌നസ്സ്...മോട്ടിവേഷന്‍ എന്ന് വാചാലമാവുകയാണ് സോഷ്യല്‍ മീഡിയ ഫാഇസിന്റെ കൊച്ചു വര്‍ത്തമാനത്തില്‍.