വടകര: കക്കട്ടി, കോട്ടക്കല്‍ തുടങ്ങിയ കടവുകളിലെ മണല്‍വാരല്‍ മേഖലയില്‍ നിലനില്‍ക്കുന്ന അനിശ്ചിതാവസ്ഥ പരിഹരിക്കണമെന്ന് പുതുപ്പണം ചീനംവീട് ശാഖാ മുസ്‌ലിം ലീഗ് ആവശ്യപ്പെട്ടു. മണല്‍ ഖനനവും വിതരണവും തദ്ദേശ സ്വയംഭരണ സ്ഥാപനങ്ങള്‍ക്ക് കീഴിലാക്കിയതോടെ മണല്‍വാരലും വിതരണവും പൂര്‍ണമായും തടസപ്പെട്ടിരിക്കുകയാണ്. വടകര മുനിസിപ്പാലിറ്റിയും ജില്ലാ ഭരണകൂടവും അനിശ്ചിതാവസ്ഥ പരിഹരിക്കാന്‍ ആവശ്യമായ നടപടികള്‍ ഉടന്‍ സ്വീകരിക്കണമെന്നും മുസ്‌ലിം ലീഗ് ആവശ്യപ്പെട്ടു.
യോഗത്തില്‍ വി.കെ അസീസ് മാസ്റ്റര്‍ അധ്യക്ഷനായി. മുനിസിപ്പല്‍ കൗണ്‍സിലര്‍ എം.പി അഹമ്മദ്, എം.പി അബ്ദുല്‍ കരീം, സിദ്ദീഖ് എ.വി, സി.പി ഹുസൈന്‍, മന്‍സൂര്‍ പി.പി, ഖാദര്‍ പി.പി, വി.കെ നിസാര്‍, പി.പി.സി അബൂബക്കര്‍ സംസാരിച്ചു.