കോഴിക്കോട്: നൈനാംവളപ്പിന്റെ ഫുട്‌ബോള്‍ പ്രേമത്തിനു ഫിഫയില്‍ നിന്ന് പ്രോത്സാഹനമായി ലഭിച്ച വിവിധ വലിപ്പത്തിലുള്ള സുവര്‍ണ ലോകകപ്പ് ട്രോഫികളുടെ മാതൃകകള്‍ ഇന്ന് ഉച്ചയ്ക്ക് 2.30 മുതല്‍ പ്രദര്‍ശിപ്പിക്കും. നൈനാംവളപ്പ് ഫുട്‌ബോള്‍ ഫാന്‍സ് അസോസിയേഷന്റെ ആഭിമുഖ്യത്തില്‍ ലോകകപ്പ് ബിഗ് സ്‌ക്രീന്‍ ഡിസ്‌പ്ലേ നടക്കുന്ന നൈനാംവളപ്പ് സ്‌കൂളിലാണു പ്രദര്‍ശനം ഒരുക്കുന്നത്.
2006, 2010 ലോകകപ്പ് വേളയിലും റഷ്യ ലോകകപ്പ് ആരംഭിക്കുന്നതിനു മാസങ്ങള്‍ക്ക് മുന്‍പും ലഭിച്ച ലോകകപ്പ് ട്രോഫിയുടെ മാതൃകകളാണു പ്രദര്‍ശിപ്പിക്കുക.
ഫ്രാന്‍സ്-ക്രൊയേഷ്യ ഫൈനല്‍ മത്സരത്തിനു ശേഷം റഷ്യയില്‍ ലോകകപ്പ് ജേതാക്കള്‍ക്കു ട്രോഫി സമ്മാനിക്കുന്ന അതേസമയത്തു തന്നെ ജയിച്ച ടീമിന്റെ ആരാധകര്‍ക്ക് നൈനാംവളപ്പില്‍ ലോകകപ്പ് ട്രോഫിയുടെ മാതൃക സമ്മാനിക്കും. 2002 ജപ്പാന്‍-കൊറിയ ലോകകപ്പ് മുതല്‍ മുടങ്ങാതെ നടന്നുവരുന്ന ചടങ്ങാണിത്.