മൊഹാലി: പഞ്ചാബിനെതിരേ ബാംഗ്ലൂരിന് ആദ്യജയം. ആറു തുടര്‍ പരാജയങ്ങള്‍ക്ക് ശേഷമാണ് ബാംഗ്ലൂരിന്റെ വിജയം. ഇതോടുകൂടി പ്ലേ ഓഫ് സാധ്യതകള്‍ കാക്കാനും ബാംഗ്ലൂരിനായി. അര്‍ദ്ധ സെഞ്ചുറികള്‍ നേടിയ ക്യാപ്റ്റന്‍ വിരാട് കോഹ്‌ലിയുടെയും ഡി വില്ലിയേഴ്‌സിന്റെയും മികവിലാണ് ബാംഗ്ലൂരിന്റെ വിജയം. 174 റണ്‍സ് പിന്തുടര്‍ന്ന ബാംഗ്ലൂര്‍ രണ്ട് വിക്കറ്റ് നഷ്ടത്തില്‍ നാലുബോളുകള്‍ ശേഷിക്കെ വിജയിക്കുകയായിരുന്നു.

ആദ്യ ബാറ്റിങ്ങില്‍ പഞ്ചാബ് 20 ഓവറില്‍ നാല് വിക്കറ്റ് നഷ്ടത്തില്‍ 173 റണ്‍സ് നേടി. ഗെയിലിന്റെ അര്‍ധ സെഞ്ചുറി മികവിലാണ് ബാംഗ്ലൂരിനെതിരേ പഞ്ചാബ് പൊരുതാവുന്ന സ്‌കോര്‍ സ്വന്തമാക്കിയത്. ടോസ് നഷ്ടപ്പെട്ട് ബാറ്റിങ്ങിനിറങ്ങിയ പഞ്ചാബിന് വേണ്ടി പവര്‍പ്ലേ ഓവറുകളില്‍ ഗെയില്‍ തകര്‍ത്തടിച്ചു. സിറാജ് എറിഞ്ഞ ആറാം ഓവറില്‍ രണ്ടു സിക്‌സും മൂന്നു ബൗണ്ടറിയുമടക്കം 24 റണ്‍സാണ് ഗെയില്‍ അടിച്ചു നേടിയത്. മറു ഭാഗത്ത് ഗെയിലിന് പിന്തുണ നല്‍കാനാകാതെ മുന്‍നിര ബാറ്റ്‌സ്മാന്‍മാര്‍ കൂടാരം കയറിയപ്പോള്‍ ഒരു ഭാഗത്ത് ക്ഷമയോടെ നങ്കൂരമിട്ടു കളിച്ച ഗെയില്‍ ടീം സ്‌കോര്‍ പതുക്കെ ചലിപ്പിച്ചു. സിറാജ് എറിഞ്ഞ അവസാന ഓവറിലെ അവസാന ബോള്‍ ബൗണ്ടറി കടത്തിയാണ് ഗെയില്‍ ഇന്നിങ്‌സ് അവസാനിപ്പിച്ചത്.

64 പന്തില്‍ 10 ബൗണ്ടറിയും അഞ്ച് സിക്‌സും സഹിതം 99 റണ്‍സ് ഗെയില്‍ നേടി. ബാംഗ്ലൂരിനു വേണ്ടി ചഹല്‍ രണ്ടു വിക്കറ്റ് നേടി. പഞ്ചാബിന് വേണ്ടി ലോകേഷ് രാഹുല്‍ (18), മായങ്ക് അഗര്‍വാള്‍ (15), സര്‍ഫറാസ് ഖാന്‍ (15), മന്‍ദീപ് സിങ് (18*), സാം കറന്‍ (1) എന്നിവരും റണ്‍സ് കണ്ടെത്തി. ബാംഗ്ലൂരിന് വേണ്ടി ചഹല്‍ രണ്ടും സിറാജ്, മോയിന്‍ അലി എന്നിവര്‍ ഓരോ വിക്കറ്റും നേടി.