തിരുവനന്തപുരം: വയനാട്ടില്‍ രാഹുലിനെതിരേ സി.പി.എമ്മിന്റെ ഒരു ലക്ഷം പേര്‍ പങ്കെടുക്കുന്ന മെഗാ സ്‌ക്വാഡ് ഇന്ന്. സി.പി.എമ്മിന്റെയും മുന്നണിയുടെയും മുഴുവന്‍ നേതാക്കളും പ്രവര്‍ത്തകരും പങ്കെടുക്കുന്ന മെഗാ സ്‌ക്വാഡ് ഒന്നൊഴിയാതെ മണ്ഡലത്തിലെ മുഴുവന്‍ വീടുകളിലും കടകളിലും സ്ഥാപനങ്ങളിലുമെത്തി പ്രവര്‍ത്തകര്‍ വോട്ട് ചോദിക്കും. 'രാഹുല്‍ വോട്ടു ചോദിക്കും മുമ്പേ മാപ്പു ചേദിക്കൂ' എന്ന മുദ്രാവാക്യവുമായാണ് ഇന്നുനടക്കുന്ന സ്‌ക്വാഡ് പ്രവര്‍ത്തനം.
കൂടാതെ ഇതുവരെ മുന്നണിക്ക് വോട്ട് ചെയ്യാത്ത അഞ്ച് വോട്ടര്‍മാരെക്കൊണ്ടെങ്കിലും ഓരോ പാര്‍ട്ടി അംഗവും വോട്ട് ചെയ്യിപ്പിക്കണമെന്ന നിര്‍ദ്ദേശവും നല്‍കിയിട്ടുണ്ട്. 80,000 പുതിയ വോട്ടര്‍മാരാണ് ഉള്ളത്. അവരെയെല്ലാവരെയും നേരില്‍ കാണാനും സി.പി.എം പദ്ധതി തയാറാക്കിയിട്ടുണ്ട്. ദേശീയ തലത്തില്‍ മോദിയെ എതിര്‍ക്കുന്നതുകൊണ്ട് മാത്രം രാഹുലിനോട് ഒരു സൗമനസ്യവും വേണ്ടെന്നാണ് സി.പി.എം നിലപാട്.

അമേത്തിയില്‍ ജയിച്ചാല്‍ രാഹുല്‍ വയനാട്ടിനെ ഉപേക്ഷിക്കും എന്നാണ് സി.പി.എം പ്രചരിപ്പിക്കുന്നത്.