ദമാം: സ്‌പോണ്‍സര്‍ മരുഭൂമിയില്‍ ഉപേക്ഷിച്ച മൂന്നു മലയാളികളടക്കം ഏഴു തൊഴിലാളികളെ രക്ഷപ്പെടുത്തി. മലയാളികളെ കൂടാതെ യുപി സ്വദേശികളും ഒരു നേപ്പാള്‍ സ്വദേശിയുമുണ്ട്. കിഴക്കന്‍ സഊദിയിലെ ദമാമിനു സമീപം ജുബൈലിലാണ് സ്‌പോണ്‍സറുടെ നിസഹകരണ നിലപാട് മൂലം ഇവര്‍ ദുരിതത്തില്‍ കഴിഞ്ഞിരുന്നത്. മരുഭൂമിയില്‍ ജീവിക്കാന്‍ പോലും ഗതിയില്ലാതെ മലയാളികളുടെ തണലില്‍ കഴിഞ്ഞ കഥ മാസങ്ങള്‍ക്ക് മുന്‍പ് സുപ്രഭാതം റിപ്പോര്‍ട്ട് ചെയ്തിരുന്നു. മലയാളികളായ റഫീഖ്, ജയകുമാര്‍, രാജിവ് രമേശ് എന്നിവര്‍ കേരളത്തിലേക്കും ബാക്കിയുള്ളവര്‍ ഡല്‍ഹിയിലേക്കുമാണ് വിമാനം കയറിയത്. നേപ്പാള്‍ സ്വദേശിയുടെ കാര്യത്തില്‍ തീരുമാനമായില്ല.

അനധികൃതമായി പ്രവര്‍ത്തിച്ച ക്രഷര്‍ യൂനിറ്റ് പൊലിസ് പൊളിച്ചുമാറ്റിയതോടെയാണ് ഇവരുടെ ദുരിതകാലം ആരംഭിച്ചത്. അനധികൃതമായതിനാല്‍ ക്രഷര്‍ യൂനിറ്റ് പൊളിച്ചു മാറ്റണമെന്നാവശ്യപ്പെട്ട് അധികൃതര്‍ നോട്ടിസ് നല്‍കിയിരുന്നു.എന്നാല്‍, കാലാവധി കഴിഞ്ഞിട്ടും നടപടികള്‍ ഒന്നുമുണ്ടാകാത്തതിനെ തുടര്‍ന്ന് സ്ഥലത്തെത്തിയ പൊലിസ് ഇത് അടച്ചു പൂട്ടി സീല്‍ ചെയ്യുകയായിരുന്നു.
എന്നാല്‍, തൊഴിലാളികളുടെ അഭ്യര്‍ഥന മാനിച്ച് താമസത്തിനുള്ള താല്‍കാലിക ഷെഡ് മാത്രം നിലനിര്‍ത്തി. പക്ഷെ, കക്കൂസ്, ജല സംഭരണിയടക്കം എടുത്തു മാറ്റിയതിനാല്‍ ജീവിതം ദുസഹമായി. സ്‌പോണ്‍സര്‍ ഉപേക്ഷിച്ചതിനെ തുടര്‍ന്ന് മലയാളികളുടെ നേതൃത്വത്തില്‍ ലേബര്‍ കോടതിയില്‍ പരാതി നല്‍കിയെങ്കിലും കേസ് വിചാരണ സമയത്തൊന്നും സ്‌പോണ്‍സര്‍ ഹാജരാകാതിരുന്നത് കേസ് നീളാനിടയായി. ഇതിനിടെ നാലു മാസത്തെ ശമ്പളം നല്‍കിയെങ്കിലും നാട്ടിലേക്ക് കയറ്റി വിടാന്‍ സ്‌പോണ്‍സര്‍ തയാറായിട്ടില്ല. ഇഖാമ കാലാവധി കഴിഞ്ഞതിനാല്‍ പുറത്തിറങ്ങാന്‍ കഴിയാത്ത ഇവര്‍ മലയാളികളുടെ നേതൃത്വത്തില്‍ എംബസിയില്‍ പരാതി നല്‍കി കാത്തിരിക്കുകയായിരുന്നു.
ദുരിതകഥ പുറത്തു വന്നതിനെ തുടര്‍ന്ന് സാമൂഹ്യ പ്രവര്‍ത്തകരും ഇന്ത്യന്‍ എംബസിയും ഇടപെട്ടാണ് മോചനം സാധ്യമായത്. രണ്ടാഴ്ച്ച മുന്‍പ് ഇവരുടെ താമസ സ്ഥലം നേരിട്ട് കണ്ട എംബസി ഉദ്യോഗസ്ഥന്‍ സഊദി തൊഴില്‍ മന്ത്രാലയത്തിന്റെ ദമാം ശാഖയില്‍ പരാതി നല്‍കിയതിനെ തുര്‍ന്ന് ജുബൈല്‍ ലേബര്‍ പി.ഫ് .എസ് ഇടപെടുകയും പ്രശ്‌ന പരിഹാരമുണ്ടാക്കുകയുമായിരുന്നു.
എംബസി ഔട്ട് പാസ് ലഭിച്ചതിനെ തുടര്‍ന്ന് പ്രവാസി സാംസ്‌കാരിക വേദി ദമാം, യൂത്ത് ഇന്ത്യ ജുബൈല്‍ എന്നീ സംഘടനകള്‍ വിമാന ടിക്കറ്റുകള്‍ നല്‍കിയതോടെയാണ് ഇവരുടെ മരുഭൂമിയിലെ ദുരിത കാലത്തിനു അറുതിയായത്.