കൊല്ലങ്കോട്: സീതാര്‍കുണ്ട് വെള്ളച്ചാട്ടത്തില്‍ വിദ്യാര്‍ഥിയെ കാണാതായി. ആലത്തൂര്‍ കാവശ്ശേരി വിപുള്യാപുരം അബൂബക്കറിന്റെ മകന്‍ ആഷിഖ്(22)നെയാണ് വെള്ളച്ചാട്ടത്തില്‍ കാണാതായത്. വിവരമറിഞ്ഞെത്തിയ നാട്ടുകാരും പൊലിസും തെരച്ചില്‍ നടത്തിയെങ്കിലും കണ്ടെത്തനായില്ല. തെരച്ചില്‍ ഇന്നും തുടരും.
കൊല്ലം ടി.കെ.എം കോളജ് ആര്‍കിടെക്റ്റില്‍ അവസാന വര്‍ഷ വിദ്യാര്‍ഥിയാണ് ആഷിഖ്. വിദ്യാര്‍ഥിയെ കാണാതായതോടെ ആലത്തൂര്‍ പൊലിസില്‍ ബന്ധുക്കള്‍ പരാതി നല്‍കി. മൊബൈല്‍ ടവര്‍ ലൊക്കേഷനിലൂടെയാണ് സീതാര്‍കുണ്ടില്‍ ശനിയാഴ്ച വൈകുന്നേരം വരെ മൊബൈല്‍ ഉപയോഗിച്ചതിന്റെ വിവരം പൊലിസിന് ലഭിച്ചു. തുടര്‍ന്ന് കൊല്ലങ്കോട് പൊലിസ് സീതാര്‍കുണ്ടിലെത്തി പരിശോധന നടത്തിയപ്പോള്‍ ആഷിഖിന്റെ ബൈക്ക് കണ്ടെത്തി.
പിന്നീട് അഗ്‌നിശമന സേനയുടെ സഹായത്തോടെ തിരച്ചില്‍ നടത്തിയെങ്കിലും കണ്ടെത്താന്‍ സാധിച്ചില്ല.
സന്ധ്യവരെ നടത്തിയ തിരച്ചില്‍ നിര്‍ത്തിവച്ച സംഘം ഇന്ന് വീണ്ടും തെരച്ചില്‍ ആരംഭിക്കുമെന്ന് കൊല്ലങ്കോട് പൊലിസ് പറഞ്ഞു. പ്രദേശത്തുനിന്നു ആഷിഖിന്റെ കാമറ നാട്ടുകാര്‍ കണ്ടെത്തി പൊലിസിന് കൈമാറി.