ബദിയഡുക്ക: ഡെങ്കിപ്പനി പകര്‍ച്ച വ്യാധികള്‍ ഏറ്റവും കൂടുതല്‍ റിപ്പോര്‍ട്ട് ചെയ്ത പഞ്ചായത്തിലെ നാലാം വാര്‍ഡ് കുണ്ടാല്‍മൂലയിലെ ബൈക്കുഞ്ചയില്‍ ആരോഗ്യ വകുപ്പ് ജീവനക്കാര്‍ കുടുംബശ്രീ പ്രവര്‍ത്തകരുടെയും നാട്ടുകാരുടെയും സഹകരണത്തോടെ കൊതുക് നശീകരണത്തിനു വേണ്ടി ഫോഗിങ് നടത്തി.
കഴിഞ്ഞ ദിവസം ഡെങ്കിപ്പനിയടക്കം റിപ്പോര്‍ട്ട് ചെയ്തിരുന്ന മേഖലയില്‍ പ്രതിരോധ പ്രവര്‍ത്തനമില്ലെന്ന് 'സുപ്രഭാതം' റിപ്പോര്‍ട്ട് ചെയ്തിരുന്നു. ഇതോടെയാണ് ആരോഗ്യ വിഭാഗം ശുചീകരണത്തിനും ബോധവല്‍ക്കരണത്തിനും ഇറങ്ങിയത്.
വെള്ളം കെട്ടിനില്‍ക്കുന്ന സ്ഥലങ്ങളില്‍ ശുചീകരണം നടത്തി. കഴിഞ്ഞ ദിവസം ഡെങ്കിപ്പനി ബാധിച്ച് ഒരു വീട്ടമ്മ മരിച്ച വിവരമറിഞ്ഞിട്ടും പ്രദേശത്ത് ആരോഗ്യ വകുപ്പ് അധികൃതര്‍ തിരിഞ്ഞു നോക്കിയില്ലെന്ന ആരോപണം ഉയര്‍ന്നിരുന്നു.
അതേ സമയം ബൈക്കുഞ്ച, നെല്ലിക്കളയ, വാന്തിച്ചാല്‍, ബാഞ്ചത്തടുക്ക തുടങ്ങി വിവിധ സ്ഥലങ്ങളില്‍ പനി പടരുമ്പോള്‍ അതിനെ പ്രതിരോധിക്കുവാനുള്ള ബോധവല്‍ക്കരണ പ്രവര്‍ത്തനം നടത്താന്‍ സര്‍ക്കാര്‍ നിയമിച്ചിട്ടുള്ള ആരോഗ്യ വകുപ്പിലെ ജൂനിയര്‍ ഹെല്‍ത്ത് ഇന്‍സ്‌പെക്ടര്‍മാരോ ആശാ വര്‍ക്കര്‍മാരോ യാതൊരു പ്രവര്‍ത്തനവും നടത്തുന്നില്ലെന്ന പരാതിയും ഉയര്‍ന്നിരുന്നു. ആരോഗ്യ വകുപ്പിലെ ജീവനക്കാര്‍ ഗ്രാമസഭകളില്‍ പങ്കെടുക്കണമെന്ന സര്‍ക്കാര്‍ ഉത്തരവ് ഉണ്ടെങ്കിലും ചുരുക്കം ചില സമയങ്ങളില്‍ മാത്രമാണ് ജീവനക്കാര്‍ എത്താറുള്ളത്. പനി പടരുന്നതിനു മുന്നോടിയായുള്ള ശുചീകരണ പ്രവര്‍ത്തനം നടത്തുന്നതിനു വേണ്ടി വാര്‍ഡ് തലത്തില്‍ എന്‍.ആര്‍.എച്ച്.എം ഫണ്ട് അനുവദിക്കുന്നുണ്ടെങ്കിലും അത് കാര്യക്ഷമമായി വിനിയോഗിക്കുന്നില്ലെന്നും ആക്ഷേപമുണ്ട്.
അതേസമയം, ഡെങ്കിപ്പനി ബാധിച്ച് പതിനഞ്ചോളം പേര്‍ വിവിധ ആശുപത്രികളില്‍ ചികിത്സയിലാണ്.