കൊട്ടാരക്കര:  അതിര്‍ത്തി തര്‍ക്കത്തിനിടെ അയല്‍വാസിയുടെ  മര്‍ദനമേറ്റ ഗൃഹനാഥന്‍ കുഴഞ്ഞുവീണ് മരിച്ചു. കലയപുരം ആറ്റുപുറത്ത് പടിഞ്ഞാറ്റതില്‍ വീട്ടില്‍ രാജേന്ദ്രന്‍ (55) ആണ് മരിച്ചത്. കഴിഞ്ഞ ദിവസം വൈകിട്ട് നാലു മണിയോടെയായിരുന്നു സംഭവം.
ഇവിടെ നേരത്തെ അതിര്‍ത്തി തര്‍ക്കം  നിലനിന്നിരുന്നു. ഇതിനിടെ കഴിഞ്ഞ ദിവസം  അയല്‍വാസി പുറമെ നിന്നും മണ്ണിടിച്ച് പുരയിടം നിരപ്പാക്കി. രാജേന്ദ്രന്റെ വസ്തുവിലേക്ക് മണ്ണ് വീണത് ചോദ്യം ചെയ്തതിനാണ് ഇദ്ദേഹത്തെ മര്‍ദിച്ചത്. മര്‍ദനമേറ്റ രാജേന്ദ്രന്‍ വീട്ടിനുള്ളിലേക്ക് കടക്കുന്നതിനിടെ കുഴഞ്ഞു വീഴുകയായിരുന്നു.  ഉടന്‍തന്നെ കൊട്ടാരക്കരയിലെ സ്വകാര്യ ആശുപത്രിയിലേക്ക് കൊണ്ടുപോയെങ്കിലും  രക്ഷിക്കാനായില്ല. കൊട്ടാരക്കര പൊലിസ് കേസെടുത്തു.
സംഭവവുമായി ബന്ധപ്പെട്ട അയല്‍വാസി ഒളിവിലാണ്. മൃതദേഹം തിരുവനന്തപുരം മെഡിക്കല്‍ കോളജ് ആശുപത്രിയില്‍ പോസ്റ്റുമോര്‍ട്ടം നടത്തിയ ശേഷം ബന്ധുക്കള്‍ക്ക് വിട്ടുകൊടുത്തു. പുഷ്പയാണ്  ഭാര്യ.  നീതു, ഗീതു എന്നിവര്‍ മക്കളാണ്.