തളിപ്പറമ്പ് (കണ്ണൂര്‍): കൊവിഡ് ഭീതിക്കിടയില്‍ യുവതി ടെസ്റ്റ് ട്യൂബ് ശിശുക്കളായ ഇരട്ടകള്‍ക്കു ജന്മം നല്‍കി. കഴിഞ്ഞ ജൂണില്‍ ഷാര്‍ജയില്‍ നിന്നു നാട്ടിലെത്തിയ കണ്ണൂര്‍ താഴെചൊവ്വ സ്വദേശിനിയായ യുവതി ഇന്നലെ ഉച്ചയ്ക്കു 12.29നും 12.30നുമായി ഒരു മിനിറ്റിന്റെ വ്യത്യാസത്തിലായിരുന്നു രണ്ട് ആണ്‍കുട്ടികള്‍ക്കു ജന്‍മം നല്‍കിയത്. ആദ്യം നടത്തിയ സ്രവ പരിശോധനയില്‍ പോസിറ്റീവായിരുന്നെങ്കിലും ശസ്ത്രക്രിയക്കു മുന്‍പേ നട ത്തിയ റാപ്പിഡ് പരിശോധനാഫലം നെഗറ്റീവായി.
എങ്കിലും കൊവിഡ് കേസുകള്‍ ചെയ്യുന്ന അതേ നിയന്ത്രണം പാലിച്ചായിരുന്നു പരിയാരത്തെ കണ്ണൂര്‍ ഗവ.മെഡിക്കല്‍ കോളജില്‍ ശസ്ത്രക്രിയ. ഇത്തരത്തില്‍ ലോകത്ത് നടക്കുന്ന ആദ്യത്തെ പ്രസവമാണ് ഇതെന്നു മെഡിക്കല്‍ കോളജ് അധികൃതര്‍ പറഞ്ഞു. കൊവിഡ് ബാധിച്ച് ആശുപത്രിയില്‍ പ്രവേശിപ്പിച്ച ഗര്‍ഭിണികളില്‍ പതിനാലാമത്തെ പ്രസവമാണിത്. ഇത് ഉള്‍പ്പെടെ ഒന്‍പതെണ്ണവും സിസേറിയനായിരുന്നു. പ്രസവ സ്ത്രീ രോഗവിദഗ്ധന്‍ ഡോ.എസ് അജിത്തിന്റെ നേതൃത്വത്തിലുള്ള സംഘത്തിലെ ഡോ.മാലിനിയാണ് ശസ്ത്രക്രിയ നടത്തിയത്. കുട്ടികള്‍ക്കു 2.35 കിലോയും 2.25 കിലോയുമാണു തൂക്കം. അമ്മയുടെയും കുട്ടികളും സുഖമായിരിക്കുന്നുവെന്നു മെഡിക്കല്‍ കോളജ് അധികൃതര്‍ പറഞ്ഞു.