പാറ്റ്‌ന: കൊവിഡ് വ്യാപനത്തോടൊപ്പം ബിഹാറില്‍ പ്രളയവും ജനജീവിതത്തെ കാര്യമായി ബാധിക്കുന്നു. കഴിഞ്ഞ ദിവസം രണ്ടുപേര്‍കൂടി മരിച്ചതോടെ പ്രളയത്തെ തുടര്‍ന്ന് മരിച്ചവരുടെ എണ്ണം പതിമൂന്നായി. 50 ലക്ഷത്തിലേറെ പേരെയാണ് നിലവില്‍ പ്രളയം പ്രതിസന്ധിയിലാക്കിയിരിക്കുന്നത്.

കനത്ത മഴയെ തുടര്‍ന്നുണ്ടായ പ്രളയത്തില്‍ നിരവധി പേര്‍ക്കു വീടുകള്‍ നഷ്ടപ്പെട്ടിട്ടുണ്ട്. സംസ്ഥാനത്തിന്റെ ഉത്തരമേഖലയിലാണ് പ്രളയം കൂടുതല്‍ നാശംവിതച്ചിരിക്കുന്നത്. മുസഫര്‍പൂര്‍ ജില്ലയുടെ ഭൂരിഭാഗം പ്രദേശങ്ങളും വെള്ളത്തിലാണ്. കുറഞ്ഞത് 14 ജില്ലകളില്‍ പ്രളയം കനത്ത നാശനഷ്ടമുണ്ടാക്കിയിട്ടുണ്ട്. നാലു ലക്ഷത്തിലേറെ പേരാണ് ദുരിതാശ്വാസ ക്യാംപുകളില്‍ കഴിയുന്നത്.

കൊവിഡ് വ്യാപനത്തിന്റെ സാഹചര്യത്തില്‍ ഇത്രയും പേര്‍ ദുരിതാശ്വാസ ക്യാംപുകളില്‍ തിങ്ങിപ്പാര്‍ക്കുന്നതും സര്‍ക്കാരിനെ പ്രതിസന്ധിയിലാക്കിയിട്ടുണ്ട്.