കുന്ദമംഗലം: ഗതാഗതക്കുരുക്കില്‍ വീര്‍പ്പു മുട്ടുന്ന ദേശീയ പാതയിലെ കാരന്തൂര്‍ മുതല്‍ കുന്ദമംഗലം വരേയുള്ള ഫൂട്പാത്ത് ചിലര്‍ കയ്യേറിയതും വാഹനങ്ങള്‍ നിര്‍ത്തന്നതും കാല്‍നടയാത്രക്കാര്‍ക്ക് പ്രയാസം സൃഷ്ടിക്കുന്നു. മര്‍ക്കസിന് സമീപം എച്ച്.പി പെട്രോള്‍ പമ്പിന് സമീപം ഫൂട്പാത്തില്‍ മാസങ്ങള്‍ക്ക് മുന്‍പ് ഉപേക്ഷിച്ച ഓട്ടോ കാരണം യാത്രക്കാര്‍ റോഡിലിറങ്ങി നടക്കേണ്ട അവസ്ഥയാണ്. നിരവധി വിദ്യാഭ്യാസ സ്ഥാപനങ്ങളിലേക്കായി ആയിരക്കണക്കിന് വിദ്യാര്‍ഥികളാണ് ഇതുവഴി കടന്നു പോകുന്നത്. സ്‌കൂള്‍ വിടുന്ന സമയങ്ങളില്‍ ഇവിടെ ഗതാഗത സ്തംഭനവും അപകടവും നിത്യസംഭവമാണ്. റോഡിന് ഇരുവശവുമുള്ള ഫൂട്പാത്തുകള്‍ ശരിയാക്കിയാല്‍ ഇവിടുത്തെ അപകടങ്ങള്‍ക്ക് ഒരു പരിധിവരേ ശമനമുണ്ടാകുമെന്നാണ് നാട്ടുകാരുടെ അഭിപ്രായം.