കൊച്ചിയില്‍ നിന്നുള്ള നാവികസേന ഇന്നലെ രാത്രിയോടെ തെരച്ചിലിനായി എത്തി
തേഞ്ഞിപ്പലം: ഞായറാഴ്ച വൈകിട്ട് കടലുണ്ടിപ്പുഴയില്‍ ഒഴുക്കില്‍പ്പെട്ട് കാണാതായ ഏഴുവയസുകാരന്‍ മുഹമ്മദ് റബീഹിനു വേണ്ടിയുള്ള രണ്ടാംദിവസത്തെ തെരച്ചിലും ഫലം കണ്ടില്ല. ഇന്നലെ രാവിലെ ഒന്‍പതു മുതല്‍ വൈകിട്ടു ആറുവരെയാണ് മീഞ്ചന്തയില്‍ നിന്നുള്ള സ്‌ക്കൂബ ടീമംഗങ്ങളും മലപ്പുറം റെസ്‌ക്യൂ ടീമും തെരച്ചില്‍ നടത്തിയത്.
ഇവര്‍ക്ക് പുറമെ തിരൂരങ്ങാടി ലൈഫ് കെയര്‍, വേങ്ങര, നിലമ്പൂര്‍ ഇ.ആര്‍.എഫ് അംഗങ്ങളും തെരച്ചില്‍ നടത്തി. കടലുണ്ടി നഗരത്തില്‍ നിന്നെത്തിയ മത്സ്യത്തൊഴിലാളികള്‍ ലൈറ്റ് ഘടിപ്പിച്ച ബോട്ടുമായി രാത്രി വൈകിയും തെരച്ചില്‍ തുടരുകയാണ്. താനൂര്‍, കടലുണ്ടി നഗരം എന്നിവിടങ്ങളില്‍ നിന്നുള്ള മൂന്നും പരപ്പനങ്ങാടിയില്‍ നിന്നുള്ള ഒരാളുമാണ് മത്സ്യത്തൊഴിലാളി സംഘത്തിലുള്ളത്.
പി. അബ്ദുല്‍ഹമീദ് എം.എല്‍.എ ആവശ്യപ്പെട്ടത് പ്രകാരം കൊച്ചിയില്‍ നിന്നുള്ള നാവികസേനയും ഇന്നലെ രാത്രിയോടെ സ്ഥലത്തെത്തിയിട്ടുണ്ട്. വീട്ടുമുറ്റത്ത് മൊബൈല്‍ ഫോണില്‍ കളിച്ചിരിക്കുകയായിരുന്ന മുഹമ്മദ് റബീഹിനെ ഞായറാഴ്ച വൈകിട്ട് നാലോടെയാണ് കാണാതായത്. വീട്ടിനടുത്തുള്ള പുഴവക്കില്‍ നിന്നും ചെരിപ്പും മൊബൈല്‍ ഫോണും കണ്ടെത്തിയതിനെ തുടര്‍ന്നാണ് പുഴയില്‍ വീണതറിഞ്ഞത്.