മലപ്പുറം: കാലിക്കറ്റ് സര്‍വകലാശാല സി സോണ്‍ കലോത്സവത്തിന് മലപ്പുറത്ത് തുടക്കമായി. മൂന്നുവരെ നടക്കുന്ന കലോത്സവത്തിന്റെ സ്റ്റേജിതര മത്സരങ്ങള്‍ മലപ്പുറം ഗവ. വനിതാ കോളജില്‍ തുടങ്ങി. ചിത്രകാരി സി.എച്ച് മാരിയത്ത് ഉദ്ഘാടനം ചെയ്തു. ഏഴു വേദികളിലായാണ്  സ്റ്റേജിതര മത്സരങ്ങള്‍ നടക്കുന്നത്.
 മലയാളം, ഇംഗ്ലീഷ്, ഉറുദു, സംസ്‌കൃതം, അറബിക് കവിതാ രചന, ഓയില്‍ പെയിന്റിങ്, പോസ്റ്റര്‍ രചന, ഫോട്ടോഗ്രഫി,  ഹിന്ദി, തമിഴ്, ഇംഗ്ലീഷ്  ചെറുകഥാ രചന, മലയാളം, അറബിക് ഉപന്യാസ രചന, എംബ്രോയ്ഡറി, കാര്‍ട്ടൂര്‍ എന്നിവ  നടന്നു. ഉദ്ഘാടന ചടങ്ങില്‍ ഗവ. വനിതാ കോളജ് പ്രിന്‍സിപ്പല്‍ ഡോ. ഗീത നമ്പ്യാര്‍, പ്രോഗ്രാം കമ്മിറ്റി ചെയര്‍മാന്‍ ഡോ.സൈനുല്‍ ആബിദ് കോട്ട, എം.എസ്.എഫ് ജില്ലാ പ്രസിഡന്റ് ടി.പി ഹാരിസ്, ജനറല്‍ സെക്രട്ടറി വി.പി അഹമ്മദ് സഹീര്‍, ട്രഷറര്‍ നിസാജ് എടപ്പറ്റ, കാലിക്കറ്റ് സര്‍വകലാശാല യൂനിയന്‍ വൈസ് ചെയര്‍പേഴ്‌സണ്‍ സി. സജിത, ജില്ലാ എക്‌സിക്യൂട്ടീവ് അംഗം കെ.എം ഇസ്മാഈല്‍, മലപ്പുറം ഗവ. കോളജ് യൂനിയന്‍ അഡൈ്വസര്‍ ടി. ഹസനത്ത്, ഹംസ തോടേങ്ങല്‍ പങ്കെടുത്തു. സ്റ്റേജിതര മത്സരങ്ങള്‍ നാളെ സമാപിക്കും. സ്റ്റേജിന മത്സരങ്ങള്‍ ഒന്നു മുതല്‍ മൂന്നുവരെ നടക്കും.
മലപ്പുറം ഗവ. കോളജിലാണ് പ്രധാന വേദി. ജില്ലയിലെ 120 കോളജുകളില്‍ നിന്നുള്ള പ്രതിഭകളാണ് ആറുദിവസങ്ങളിലായി നടക്കുന്ന കലാമാമാങ്കത്തില്‍ മാറ്റുരക്കുന്നത്.