സോള്‍: അമേരിക്കയുമായുള്ള പ്രശ്‌നം രൂക്ഷമായിരിക്കെ ആശങ്കയുയര്‍ത്തി ഉത്തരകൊറിയ വീണ്ടും ബാലിസ്റ്റിക് മിസൈല്‍ പരീക്ഷിച്ചു. ദക്ഷിണകൊറിയയെ ഉദ്ധരിച്ച് യോന്‍ഹാപ് ന്യൂസ് എജന്‍സിയാണ് പരീക്ഷണം റിപ്പോര്‍ട്ട് ചെയ്തത്. മിസൈല്‍ പരീക്ഷണം പരാജയമായിരുന്നുവെന്ന് അമേരിക്കയും ദക്ഷിണകൊറിയയും അവകാശപ്പെട്ടു.

ഉത്തരകൊറിയയുമായി ബന്ധപ്പെട്ടുള്ള പ്രശ്‌നങ്ങള്‍ സംഘര്‍ഷത്തില്‍ കലാശിക്കുമെന്ന് പ്രസിഡന്റ് ട്രംപ് മുന്നറിയിപ്പിന് പിന്നാലെയാണ് മിസൈല്‍ പരീക്ഷണം. ഉത്തരകൊറിയയുടെ നടപടി മോശമാണെന്നും പരീക്ഷണത്തിലൂടെ ചൈനയുടെ ബഹുമാന്യനായ പ്രസിഡന്റിനെഅപമാനിച്ചിരിക്കുകയാണെന്നും ട്രംപ് ട്വിറ്ററില്‍ കുറിച്ചു.

ഉത്തരകൊറിയയുടെ മധ്യദൂര ബാലിസ്റ്റിക് മിസൈല്‍ കൊറിയന്‍ അതിര്‍ത്തി കടക്കുന്നതിന് മുമ്പ് തകര്‍ന്നു വീഴുകയായിരുന്നുവെന്നാണ് അമേരിക്കയും ദക്ഷിണകൊറിയയും അവകാശപ്പെടുന്നത്. മിസൈല്‍ പരീക്ഷണത്തിന്റെ പശ്ചാത്തലത്തില്‍ കാര്യങ്ങള്‍ സൂക്ഷ്മമായി നിരീക്ഷിച്ച്് വരികയാണെന്ന് വൈറ്റ് ഹൗസ് അറിയിച്ചു.