കൊട്ടാരക്കര: 13 കാരിക്ക് നേരെ ലൈംഗിക അതിക്രമം നടത്തിയ കേസില്‍ വയോധികനെ കൊട്ടാരക്കര പൊലിസ് അറസ്റ്റ് ചെയ്തു. വിലങ്ങറ വിയന്തൂര്‍ വിനീത ഭവനില്‍ വിക്രമന്‍ പിള്ള (ജഗദീശന്‍ 57)യെയാണ് അറസ്റ്റ് ചെയ്തത്. പ്രതിയെ കൊട്ടാരക്കര കോടതി റിമാന്‍ഡ് ചെയ്തു. വിഷുദിനത്തിലായിരുന്നു കേസിനാസ്പദമായ സംഭവം.
അമ്മയുടെ മരണത്തെ തുടര്‍ന്ന് കോണ്‍വെന്റില്‍ നിന്ന് പഠിക്കുന്ന കുട്ടി അവധിക്കാലത്ത് വീട്ടിലേക്കെത്തിയതാണ്. അമ്മായിയുടെ വീട്ടിലാണ് അവധിക്കാലത്ത് താമസിക്കുന്നതെങ്കിലും വിഷുക്കൈനീട്ടം വാങ്ങാനായി അച്ഛന്‍ താമസിക്കുന്ന സ്വന്തം വീട്ടിലേക്ക് പോയതാണ്. പിതാവിന്റെ സുഹൃത്തും കൂലിപ്പണിക്കാരനുമായ വിക്രമന്‍ പിള്ള വീടിന് സമീപത്തെ റബ്ബര്‍ തോട്ടത്തിലെത്തി വിഷുക്കൈനീട്ടം തരാമെന്ന് പറഞ്ഞ് കുട്ടിയെ അടുത്തേക്ക് വിളിച്ചു. കുട്ടി പോകാന്‍ കൂട്ടാക്കാതെ വന്നതോടെ വിക്രമന്‍ പിള്ള വീട്ടിലെത്തുകയും കതക് അടച്ച ശേഷം കുട്ടിയോട് ലൈംഗിക അതിക്രമം നടത്തുകയുമായിരുന്നു. കുതറിമാറി നിലവിളിയോടെ പുറത്തേക്കോടിയ പെണ്‍കുട്ടി പിന്നീട് രക്ഷിതാവിനെക്കൂട്ടി കൊട്ടാരക്കര വനിതാസെല്ലില്‍ പരാതി നല്‍കി. വിക്രമന്‍ പിള്ള പിന്നുകൊണ്ട് കുത്തി വേദനിപ്പിച്ചതായും പരാതിയില്‍ പറയുന്നുണ്ട്. വനിതാ സെല്ലില്‍ നിന്നും കൊട്ടാരക്കര പൊലിസിന് കൈമാറിയ കേസിലാണ് സി.ഐ. എസ്. നുഅ്മാന്റെ നേതൃത്വത്തിലുള്ള സംഘം പ്രതിയെ അറസ്റ്റ് ചെയ്തത്.