നിലമ്പൂര്‍: പരാതിക്ക് ഫലം കണ്ടു, സ്‌കൂള്‍ പട്ടികയില്‍ നിന്നും തെറിച്ച വിദ്യാര്‍ഥികള്‍ക്ക് സ്‌പെഷ്യല്‍ ഉത്തരവിലൂടെ പ്ലസ് വണ്‍ പ്രവേശനം. ഭിന്ന ശേഷി, എസ്.സി, എസ്.ടി പിന്നോക്ക വിഭാഗം കുട്ടികള്‍ക്ക് എരഞ്ഞിമങ്ങാട് ഗവ. ഹയര്‍ സെക്കന്‍ഡറി സ്‌കൂളില്‍ പ്ലസ് വണ്‍ പ്രവേശനം നിഷേധിച്ചെന്ന് കാണിച്ച് യൂത്ത് കോണ്‍ഗ്രസ് വയനാട് ലോക്‌സഭാ കമ്മിറ്റി വൈസ് പ്രസിഡന്റ് എം.കെ ഹാരിസ് ബാബുവും യൂത്ത് കോണ്‍ഗ്രസ് മണ്ഡലം കമ്മിറ്റിയും സ്‌കൂള്‍ അധികൃതര്‍ക്കെതിരെ ഹയര്‍സെക്കന്‍ഡറി ഡയറക്ടര്‍ക്ക് നല്‍കിയ പരാതിയിലാണ് നടപടി. 7 കുട്ടികള്‍ക്കാണ് പ്രത്യേക ഉത്തരവിലൂടെ കഴിഞ്ഞ ദിവസം എരഞ്ഞിമങ്ങാട് സ്‌കൂളില്‍ പ്ലസ് വണിന് പ്രവേശനം നല്‍കിയത്. വിജയ ശതമാനം ഉയര്‍ത്തുന്നതിന് പ്ലസ് വണ്‍ അപേക്ഷകളില്‍ കൃത്രിമം കാണിച്ച് പിന്നാക്ക വിഭാഗം വിദ്യാര്‍ഥികള്‍ക്ക് സര്‍ക്കാര്‍ സ്‌കൂളില്‍ പ്രവേശനം നിഷേധിച്ചുവെന്നായിരുന്നു പരാതിയില്‍ ഉന്നയിച്ചിരുന്നത്. പ്രവേശനത്തിന് അക്ഷയ സെന്റര്‍ മുഖേന അപേക്ഷ നല്‍കി പകര്‍പ്പ് സ്‌കൂളില്‍ ഹാജരാക്കിയപ്പോള്‍ മുന്‍ഗണനാ ക്രമത്തില്‍ അധികൃതര്‍ മാറ്റം വരുത്തി എന്നായിരുന്നു ആരോപണം. മൂന്നു ഭിന്ന ശേഷിക്കാര്‍ക്കും, രണ്ടു പിന്നോക്ക വര്‍ഗ വിഭാഗക്കാര്‍ക്കും 2 ജനറല്‍ വിഭാഗം വിദ്യാര്‍ഥികള്‍ക്കുമാണ് പരാതിയെ തുടര്‍ന്ന് സീറ്റ് നല്‍കിയത്.