മലപ്പുറം: കോണ്‍ഗ്രസ് അധ്യക്ഷനും വയനാട് ലോക്‌സഭാ മണ്ഡലം യു.ഡി.എഫ് സ്ഥാനാര്‍ഥിയുമായ രാഹുല്‍ ഗാന്ധി ഇന്ന് ജില്ലയുടെ തെരഞ്ഞെടുപ്പ് ആവേശത്തിലേക്ക് പറന്നിറങ്ങും. വയനാട് ലോക്‌സഭാ മണ്ഡലത്തില്‍പ്പെട്ട വണ്ടൂരിലാണ് രാഹുല്‍ ഗാന്ധിക്ക് ആവേശ സ്വീകരണം ഒരുക്കുന്നത്.
വണ്ടൂര്‍ സിയെന്ന ബൈപാസ് റോഡിന് സമീപത്തെ വിശാലമായ പാടം ഇതിനായി സജ്ജമാക്കിയുണ്ട്. വൈകിട്ട് മൂന്നിന് നടക്കുന്ന പൊതുസമ്മേളനത്തില്‍ പങ്കെടുക്കാന്‍ വാണിയമ്പലം സ്‌കൂള്‍ മൈതാനത്ത് ഹെലികോപ്റ്ററില്‍ ഇറങ്ങി, അവിടെനിന്നു കാര്‍ മാര്‍ഗമായിരിക്കും രാഹുല്‍ ഗാന്ധി വണ്ടൂരില്‍ എത്തുക.
വലിയതോതിലുള്ള സുരക്ഷാ സംവിധാനങ്ങളും ഒരുക്കങ്ങളുമാണ് ഇതിനായി പൂര്‍ത്തിയാക്കിയിരിക്കുന്നത്.
വയനാട് ലോക്‌സഭാ മണ്ഡലത്തിനു പുറമെ ജില്ലയിലെ മറ്റു മണ്ഡലങ്ങളില്‍നിന്നുമുള്ള ആയിരകണക്കിനു യു.ഡി.എഫ് പ്രവര്‍ത്തകരെ കൊണ്ട് ഇന്ന് വണ്ടൂരും പരിസരങ്ങളും വീര്‍പ്പുമുട്ടും. രാഹുല്‍ ഗാന്ധിക്കു വരവേല്‍പ്പുനല്‍കിയുളള ബോര്‍ഡുകളും പോസ്റ്ററുകളും വയനാട് മണ്ഡലത്തിലും പരിസര മണ്ഡലങ്ങളിലും നിറഞ്ഞിട്ടുണ്ട്. 20ന് പ്രിയങ്കാഗാന്ധിയും ജില്ലയില്‍ എത്തുമെന്നാണ് അറിയുന്നത്.
വയനാട് ലോക്‌സഭാ മണ്ഡലത്തില്‍ തന്നെ ഏറ്റവും കൂടുതല്‍ വോട്ടര്‍മാരുള്ള അസംബ്ലി മണ്ഡലമാണ് വണ്ടൂര്‍. വണ്ടൂരിലെയും പരിസരങ്ങളിലെയും ഗതാഗതക്കുരുക്ക് കണക്കിലെടുത്ത് പൊലിസ് ശാസ്ത്രീയമായ മുന്നൊരുക്കങ്ങള്‍ നടത്തിയിട്ടുണ്ട്. കഴിഞ്ഞ ദിവസം പ്രതിപക്ഷ നേതാവ് രമേശ് ചെന്നിത്തല, എം.എല്‍.എമാരായ എ.പി അനില്‍കുമാര്‍, വി.ടി ബല്‍റാം, ഡി.സി.സി പ്രസിഡന്റ് വി.വി പ്രകാശ് എന്നിവര്‍ വണ്ടൂരിലെത്തി സ്ഥിതിഗതികള്‍ വിലയിരുത്തിയിരുന്നു.