പെരുമ്പാവൂര്‍: ശുചിത്വമിഷനും വാഴക്കുളം ബ്ലോക്ക് പഞ്ചായത്തും തണ്ടേക്കാട് ജമാഅത് ഹയര്‍ സെക്കണ്ടറി സ്‌കൂളില്‍ സംഘടിപ്പിച്ചിരിക്കുന്ന ഗ്രീഷ്‌മോല്‍സവം ശ്രദ്ദേയമാകുന്നു. എന്റെ മാലിന്യം എന്റെ ഉത്തരവാദിത്വം ചക്ക,മാങ്ങ,തേങ്ങ എന്ന പേരിലാണ് മൂന്ന് ദിവസം നീണ്ടു നില്‍ക്കുന്ന ക്യാംപ് സംഘടിപ്പിച്ചിരിക്കുന്നത്.
അജൈവ മാലിന്യങ്ങളുടെ ശരിയായ തരം തിരിക്കല്‍, പരിപാലനം, പ്രകൃതി ഭക്ഷണങ്ങളിലേക്കുളള മടക്കം എന്നിവയാണ് ക്യാപിന്റെ പ്രധാന ലക്ഷ്യം. ആദ്യദിനത്തില്‍ നാടന്‍ മാമ്പഴം വിളമ്പിയാണ് കുട്ടികളെ ക്യാംപില്‍ വരവേറ്റത്. മാങ്ങാ ചമ്മന്തി, നാടന്‍ മാങ്ങകളുടെ രുചിഭേദം അനുഭവിച്ചറിയല്‍, എരിവുള്ള മാമ്പഴം എന്നിവയ്യം ഒരുക്കിയിരുന്നു.രണ്ടാം ദിനത്തില്‍ തേങ്ങാ പൂളും ശര്‍ക്കരയും നല്‍കിയാണ് ക്യാംപ് ആരംഭിച്ചത്. അവസാന ദിനം ചക്ക വിഭവങ്ങളാണ് കുട്ടികള്‍ക്ക് വിളമ്പിയത്. ക്യാംപിന്റെ ഭാഗമായി വീട് സന്ദര്‍ശനം, തിരഞ്ഞെടുത്ത വീടുകളില്‍ മാവ്, പ്ലാവ് എന്നിവ നടാനും ക്യാംപ് അംഗങ്ങള്‍ സമയം കണ്ടെത്തി.
തണ്ടേക്കാട് ജമാഅത്ത് എച്ച്.എസ്.എസില്‍ നടന്ന പരിപാടി വാഴക്കുളം ബ്ലോക്ക് പഞ്ചായത്ത് പ്രസിഡന്റ് സി.കെ മുംതാസ് ടീച്ചര്‍ ഉദ്ഘാടനം ചെയ്തു. സ്‌കൂള്‍ മാനേജര്‍ എം.എം അബ്ദുല്‍ ലത്തീഫ് മുഖ്യ പ്രഭാഷണം നടത്തി. ബ്ലോക്ക് പഞ്ചായത്ത് അംഗങ്ങളായ നഗീന ഹാഷിം, രാജു മാത്താറ, നൂര്‍ജഹാന്‍ സക്കീര്‍, ശുചിത്വമിഷന്‍ സംസ്ഥാന റിസോഴ്‌സ് പേഴ്‌സണ്‍ പി.ആര്‍ വിജയകുമാര്‍, ഹെഡ്മാസ്റ്റര്‍ വി.പി അബൂബക്കര്‍, കെ.എ നൗഷാദ്, വി.എം ആരിഫ, എം.ഐ മുഹമ്മദ് റാഫി, വനജ രഘുനാഥ്, മഹേശ്വരി രാജന്‍, പി.റ്റി രാജേശ്വരി, ഏലിയാമ്മ വര്‍ഗീസ് എന്നിവര്‍ സംസാരിച്ചു.