കോതമംഗലം: സ്വകാര്യ വ്യക്തിയുടെ മതില്‍ പൊളിച്ചുമാറ്റിയതായി പരാതി. പല്ലാരിമംഗലം പഞ്ചായത്തിലെ ഒന്നാം വാര്‍ഡില്‍ മടിയൂര്‍ പാറക്കല്‍ ഇബ്രാഹിമിന്റെ വീട്ടിലേക്കുള്ള വഴിയരികില്‍ നിര്‍മ്മിച്ചിരുന്ന മതിലാണ് ഇന്നലെ രാവിലെ  ഒരു സംഘം ആളുകള്‍ പൊളിച്ചുമാറ്റിയത്.
മടിയൂര്‍ സ്‌കൂള്‍പടിക്ക് സമീപം കക്കാട്ടുകുടിച്ചാല്‍ റോഡിനോട് ചേര്‍ന്നാണ് മതില്‍ നിര്‍മിച്ചിരുന്നത്.
     വിദേശത്തായിരുന്ന ഇബ്രാഹിം അവധിക്ക് നാട്ടില്‍ എത്തിയ ശേഷം ഇന്നലെ രാവിലെ 9 മണിയോടെയാണ് മടങ്ങിയത്.അതിനു ശേഷമാണ് മതില്‍ പൊളിച്ചത്. മതില്‍ പൊളിക്കുന്ന സമയം കുട്ടികള്‍ മാത്രമാണ് വീട്ടില്‍ ഉണ്ടായിരുന്നത്.
കുട്ടികളെ ഭീഷണിപ്പെടുത്തിയ ശേഷമാണ് മതില്‍ പൊളിച്ചുമാറ്റിയതെന്നും രാഷ്ട്രീയ വിരോധത്തിന്റെ പേരില്‍ പത്തോളം വരുന്ന സി.പി.എം.പ്രവര്‍ത്തകരാണ് പിക്കാസ്, കമ്പി തുടങ്ങിയ മാരകായുധങ്ങളുമായി എത്തി മതില്‍ പൊളിച്ചതെന്നും ഇബ്രാഹിമിന്റെ   വീട്ടുകാര്‍ പറഞ്ഞു.
വീട്ടുകാരുടെ പരാതിയില്‍ പോത്താനിക്കാട് പൊലിസ് കേസ് എടുത്തിട്ടുണ്ട്.