പയ്യോളി: യാത്രക്കാരന്‍ അറിയാതെ ദുബൈയിലേക്ക് കഞ്ചാവ് കടത്താന്‍ ശ്രമിച്ച യുവാവ് അറസ്റ്റില്‍. തുറയൂര്‍ മണപ്പുറത്ത് താഴെ ഷറഫുദ്ദീന്‍ (20) ആണ് അറസ്റ്റിലായത്.
ദുബൈയിലേക്കു പോകുന്ന കൊവ്വുമ്മല്‍ സാദിഖിന്റെ കൈയില്‍ സുഹൃത്തിനു കൊടുത്തയച്ച ജീന്‍സ് പാന്റ്‌സ് സാദിഖിന്റെ വീട്ടുകാര്‍ പരിശോധിച്ചപ്പോഴാണ് സിഗരറ്റ് പാക്കിനകത്ത് കഞ്ചാവാണെന്ന് കണ്ടെത്തിയത്. ഗോള്‍ഡ് ഫ്‌ളേക്കിന്റെ ഏഴു പായ്ക്കറ്റുകളിലാണ് കഞ്ചാവ് നിറച്ചത്.
പൊലിസിനു ലഭിച്ച വിവരത്തെ തുടര്‍ന്ന് വടകര ഡിവൈ.എസ്.പിയുടെ സ്‌പെഷല്‍ സ്‌ക്വാഡ് സ്ഥലത്തെത്തി കഞ്ചാവ് കസ്റ്റഡിയിലെടുത്തു. അഞ്ചു ഗ്രാം കഞ്ചാവാണ് പൊലിസ് പിടിച്ചെടുത്തത്.
സാദിഖ് നേരത്തേ നിശ്ചയിച്ചതു പ്രകാരം ദുബൈയിലേക്കു പോവുകയും ചെയ്തു. സഹോദരന്‍ അര്‍ഷാദിന്റെ പരാതിയിലാണ് പൊലിസ് പരിശോധന നടത്തിയത്. പയ്യോളി മുന്‍സിഫ് കോടതിയില്‍ ഹാജരാക്കിയ പ്രതിക്ക് ജാമ്യം നല്‍കി.